حلقات "اجي تعرف صحتك" على "گود".. الحلقة 1 "السياتيك أو بوزلوم" : واش الرياضيين اللي كيهزو الحديد اكثر عرضة؟.. وواش العملية هي الحل الوحيد ولا كاينين حلول طبيعية؟.. وواش الكويان بصح كيداوي؟

بوزلوم او ساتيك او مرض عرق النسا هو مرض مرتبط بالعصب الوركي للي مسؤول على الوظائف الحركية بحال المشي، ومسؤول على الوظائف الحسية بحال الاحساس بالبرودة و السخونة.. كيعطي ألم لكيبدا من اسفل الظهر و كينزل حتى الأصابع القدمين.
أجيو تفهمو معايا كيفاش كيوقع هاد الالم؟؟
العمود الفقري كيتكون من فقرات و مابين كل فقرة و فقرة كين واحد القرص (الغضروف) للهدف ديالو هو امتصاص الصدمات و المساهمة فحركة الظهر وللي مع تقدم السن و مع عوامل اخرى يقدر يتعرض للتشققات و للفتق بعد ذلك .
كنلقاو أعصاب خارجة من جهة ليمنة و ليسرة من العمود الفقري لكيساهمو فالوظائف الحسية و الحركية ديال الذات.
فالحالة ديال السياتيك هاد العصب الوركي كيكون عرضة فالجدر ديالو L5 و S1 لوحد الضغط لفغالب الاحيان كيكون بسبب الفتق الشيء للي كيأدي به للالتهاب تم الاحساس بالالم.
شنو هي اعراض بوزلوم؟
كيجيونا جوج انواع ديال المرضى :
لول مريض كيعاني من ألم قديم فالظهر لمع المدة بدا كينزل من خلف المؤخرة و من خلف ولا جنب الفخد و الساق و كيوصل هاد الالم حتى الاصابع القدمين.
و فالحالة الثانية كيجينا مريض للي فجأة من بعد ما طاح ولا هز الثقل... كيحس بألم لحتى هو من اسفل الظهر حتا الاصابع القدمين.
و فالحالتين كيقدر يصاحبو شعور بالوخز بالخدر بالتنمال ولا بحال الشعور بموجات كهربائية، هاد الالم كيتزاد مع حمل الاثقال و السعال و القبض و الجلوس او الوقوف المطول و كينقص مع الراحة، و هاد المشكل يقدر ميجيش لاسابيع و شهور و تكون عادي حتى لشي نهار تحس بألم من خفيف حتى لالم لكيشد بيه المريض الفراش.
شنو هما العوامل اللي كتساهم باش يجيك السياتيك اللي سبابو الفتق؟
اللى كنتي مابين 30 و 50 سنة ، لكان عندك مشكل السمنة لكنتي كتهز الثقل خاصة فالدار و لا الخدمة ولا فلاصال و هادشي خاصة عند الرياضيين المبتدئين للي كيبداو يهزو الحديد ولا كيقومو بحركات رياضية للي خاص الظهر يبقا مستقيم فيها بحال السكوات... بدون اشراف مختص، لكان عندك مشكل تقوس الظهر و لفيت ليك طحتي على ظهرك اولا الرياضات لكيبقا الشخص ديما كيتعرض فيها للصدمات فظهرو خاصة رياضات القتالية بحال الملاكمة ..
واش الفتق هو السبب الوحيد ولا كينين اسباب اخرى؟
الفتق و خشونة المفاصل كيشكلو كثر من٪ 90 من الاسباب، غي هو حنا كأطباء من السهل علينا نكشفو اسباب اخرى وكنشكو فيها لكان هاد المشكل كيصاحبو السخانة فقدان الشهية و الوزن، لكان المشكل كيبدا قبل 20 سنة و لا بعد 50 سنة ولكان هاد الالم دائم كيبقا حتى عند الراحة و كيتزاد بالليل ولكان المريض كيداوي على امراض اخرى بحال السرطان....
شنو هما هاد الاسباب الاخرى ؟
كينين بزاف الاسباب بحال الاورام الحميدة ولا الخبيثة و كين مكروب فالعمود الفقري وفالقرص بحال مكروب السل لشائع عندنا فالمغرب ولا شي مشكل مناعي... و كينين اسباب اخرى لكنقدرو نعرفوها بسهولة اما بالاسئلة لكنطرحوها عليكم او فالتقليبة ديال المريض لكتدوز بمراحل ولا بتحاليل المخبرية و الراديوات ..
و فهاد الحالة بالزيادة على مضاعفات السياتيك كيكونو مضاعفات متفاوتة الخطورة لتقد تقيس حتى الحياة ديال المريض وهنا خاص التدخل السريع ديالنا كأطباء و التعاون ديال المريض باش نعرفو السبب و نلقاو ليه الدوا بسرعة.
علاش خاص ضروري تشوفو طبيب فاش تشكو فبوزلوم؟
فاش كيجي عندنا المريض كيكون عندنا 3 اهداف اولا نشخصو المرض و نعطوه سمية سياتيك نشوفو واش المريض جا بمضاعفات لخصها التدخل الجراحي المستعجل و نقلبو على السبب ديل هاد المرض .
ومن اجل هادشي كنسولو المريض كنقلبوه ،لتظاهر بلي غمشكل الفتق ولا الانزلاق الغضروفي بدون اي مضاعفات كنعطيو المريض الدوا و النصائح الضرورية، فحالت لجانا المريض من بعد شهر ديال الدوا و مكينش تحسن ولاجا بمضاعفات ولا شكينا فاسباب اخرى خاص ضروري تحاليل و راديوات وفهاد الحالة كنفضلو l'IRM و كنقومو بالتدخل ليقدر فحالة المضاعفات يكون الجراحة المستعجلة.
شنو هما هاد المضاعفات؟
كاين اولا الالم الحاد للي وخا نعطيو لمريض لمورفين مكيفوتوش.
كاين تاني فاش كيتقاس الوظيفة الحركية ديال العصب الوركي وهنا المريض مكيقدرش يهز اولا ينزل القدم ديالو.
و كاين ثالثا المشكل ديال فقدان السيطرة على البولة و الخروج ولا عدم القدرة ولا صعوبة فالبول و فقدان الاحساس بمنطقة الحوض فقدان حركة القدمين والاحساس بهم و يقدر يكون حتى مشكل العجز الجنسي كندخلو فهاد الحالة المريض لغرفة العمليات باش نعتقو هاد الوظائف و اي تأخر يقد يخلي المريض عاجز للابد.
شنو هو الدوا وواش كين دوا طبيعي؟
90٪ من الحالات؛ الألم كيمشي بدون دواء ولا بدوا لكنكتبوه لمريض لخاص يتبعو بالرغم من ان هاد مضادات الالتهاب للي كنعطوها كتضر شويا فالمعدة و فالكلاوي هنا خاص لمريض لكان عندو التهاب المعدة يقولها لطبيب باش يكتب ليه معاه دوا المعدة ولكان كياخد دوا طنسيو و لا الضيقة يعلم الطبيب بهاد المشكل حتى هو و كنصحو لمريض باش يشرب الما مزيان و ينعس فبلاصة مسطحة و قاصحة بحال الارض ويتمشا شوية وفاش يحس بالالم يرتاح ومايشدش لفراش و كنقدو نعطيوه سمطة مدة شهر و من بعد مكيفوتو الحال و كينعادم الالم كنكتبو ليه الترويض لهو مهم و مهم جدا و لبسبابو غدي يتحسن لمريض مستقبلا و ميبقاش كيعاني بزاف من هاد المرض و كينين احتياطات لخاص يتبعهم المريض حياتو كاملة باش يتحسن طبيعيا ويتفادا دوك المضاعفات.
فحالة لمفاتوش الحال نقدو نلتجؤ لابر فالعمود الفقري لكتهمد الالم طيلة 3 حتى 6 اشهر فحالة لمكان استجابة مع الدوا مكبقاش عندنا شي حل اخر من غير الجراحة.
وبالنسبة للكويان على بوزلوم ولا قتل العرق ؟
السياتيك هو مرض لكيعرف تطور نهار راك متألم و نهار راك عاطي راحة راسك و ملتزم بالاحتياطات و النصائح وراك مزيان الناس كيمشيو يكويو و يقتلو لعرق و هو لبغينا نوصلو ليه خاص نفتحو عاد نقيسوه و فاش كيكويو عيعطيو راسهم راجثحة من بعد وكيگولو راه قدا فيا هو راه غيتطور طبيعي ديال المرض.
شنو خاصنا نستافدو من هادشي؟
السياتيك مرض لي فالغالب كنقدو نتغلبو عليه علميا ولاكان التشخيص مبكر و لمشيتي عند الطبيب و ثقتي فيه و التزمتي بداكشي لقال ليك اما لبقيتي طالق وذنيك و تسمع لهادا لعاطيك عشبة تهلك ليك الكبدة و الكلاوي ولا تمشي تكوي و تهمل راسك تتوصل لمضاعفات صعيبة لمن وراها كيبقا غندم و كن غيمشيت عند الطبيب من اللول .
الصحة امانة الى بخلتي عليها و هملتيها غادا تخلا عليك و انت فأمس الحاجة لها و تبقى، من بعد معتمد على شخص اخر باش يساعدك فقضاء الضروريات للقيتيه.