روينة فالتحالفات فمقاطعات الرباط.. الزومي والبوزيدي ضغطو على المنسق الجهوي ديال الأحرار ومنتخبين جاو اللولين كعاو

تحالفات غريبة فالمقاطعات بالرباط، مكاينش تناسق ولا انسجام، شد ليا نقطع ليك، حسب عدة منتخبين هضرات مع "گود".
اخير المعطيات تفيد بلي مجموعة عمر البحراوي، العمدة السابقة، واحد الاعيان فالرباط لي جاب مقاعد مهمة باسم الاحرار، كعا ورفض التحالف اللي داير سعيد بنمبارك مع عبد الاله البوزيدي وخديجة الزومي اللي داخلة فكاع التحالفات فالرباط شفناها ف الغرف المهنية كيفاش تدخلت ولات وسيطة . هاد التحالف هجين حسب منتخبين، بحيث هادشي ميمكنش يتنزل فالمقاطعات وبعض المجالس لأنه ناس كتصوت على الاشخاص ماشي على الاحزاب.
بنمبارك تسبب ف احتقان داخل هياكل الاحرار فالرباط، واخا الاحزاب قابلين تكون مرتو عمدة للعاصمة، حيث كفاءة وتستحق، وكولشي قابل بها، ولكن هو رافضينو بسبب طريقة توزيع الرئاسات على باقي الاحزاب دون احترام للفائزين ولأصوات المواطنين.
مثلا ف اكدال، جاب وكيل لائحة الاحرار كمال العمراني 10 مقاعد بوحدو، هزم كبار المنتخبين وهزم صحاب الشكارة، ورغم ذلك تحالف بنمبارك والزومي باغين يطيحوه، وباغين يعطيو رئاسة المقاطعة للبوزيدي ولد تاونات، واللي طلع برلماني فدائرة المحيط.
الاستقلال تلاعب بمرشحين ديالو اللي جابو ليه اصوات ومقاعد مهمة، فحال خالد مجاور، للي كان نائب العمدة وعندي اجماع كافة القوى الحزبية حتى البي جي دي كان معه مزيان، مبغاوش يوافقو عليه يكون رئيس مقاطعة حسان، وباغين يعطيوها لواحد سبق عندو حكم قضائي خايب وسبق ليه كان رئيس المقاطعة ومدار فيها والو والتقارير كتقول هادشي.
دبا اشمن رسالة باغي توصل الزومي وبنبمارك للرباطيين، زعما بغات تقوليهم اصواتكم ما ساوية والو. خليو الرباطيين يقررو مصيرهم ويديرو تحالفتهم بطريقتهم. يقول منتخب باغي يمشي كاع من السياسة. هضر مع "گود".
هادشي ينطبق على السويسي وعلى يعقوب المنصور، كولشي مرون. شد ليا نقطع ليك . هادشي لي دايرا تحالف الزومي مع بنمبارك تسبب ف انقسام داخلي بين المرشحين للرئاسة ديال المقاطعات.