علاش المغرب مابغاش يتصالح مع الصبليون؟.. مايمكنش نتصالحو مع دولة واللي حاكمها هو اللي كايدير معانا القوالب

الأزمة المغربية الإسبانية طولات لواحد الدرجة كبيرة، وعمر ماوقع شي جفاء طويل بين المغرب والصبليون فالعهد الجديد باستثناء المشكل ديال "جزيرة ليلى" اللي كان غايوصلنا للحرب.
هاد الأزمة بين المغرب والصبليون كان يعتقد أن مبرراتها مشات ومابقاتش، وأنها مطولة غير من أجل المفاوضات، لكن كاين جديد بخصوص أن رئيس حكومة الصبليون هو اللي قاد عملية إدخال زعيم البوليساريو لإسبانيا تحت الدف وبباسبور مزور.
المعنى من هادشي هو أن بيدرو سانشيز، اللي هو رئيس الحكومة ديالهم، واللي كايحكم فعليا فإسبانيا هو اللي نسق عملية دخول "ابراهيم غالي" خفية على المغرب، اللي كايقوليه فالعلن نتوما شركاء استراتيجيين ديالنا.
من هنا كايبان أن أزمتنا مع الصبليون، تقدر تستامر حتى لنهاية حكم سانشيز، ما يعني أن عملية "مرحبا" ماغاتكونش حتى هاد العام، وأيضا سبتة ومليلية ماغايتحلوش حدودنا معاهم.
وهنا كنوصلو لنتيجة، أن المغرب عندو مشكل مع اللي كيطعنو فالظهر وكيضحك ليه فوجهو، وسانشيز هادشي اللي دار تماما.