صفقة دراسة لوزارة السياحة. معطيات حصرية جابتها "كود": ماشي الدولة اللي مخلصة وها مهمة مكاتب الدراسات

سؤال فريق التقدم والاشتراكية فمجلس النواب اليوم على صفقة خداها مكتب دراسات على شي دراسة فوزارة السياحة كانت فيه مغالطات. هذا نائب برلماني من المعارضة ولكن ما جابش لخبار الصحيحة.
وفق مصدر "كود" فاول حاجة ان مكتبي "ساوت بريدج" لحسن بلخياط و"افريكا ادفايزر" لليلى سلاسلي وطلال البلغيتي ربحو هاد المارشي بعد ما تقدم شي 8 مكاتب اخرى.
المارشي وفق مصدر "كود" فيه دراسة يوجدوها لوزارة السياحة والصناعة والاقتصاد التضامني على "الاقتصاد التضامني" باش يولي يساهم بشكل كبير فالاقتصاد الوطني. حاليا هاد الاقتصاد التضامني يالله كيساهم بشي 2 بالمائة والهدف توصل النسبة لشي 15 بالمائة. وعليه خاص اولا دراسة فمناطق المغرب كلها. هاد المكتبين غاديين يخدمو وفق مصدر ل"كود" 15 خبير لمدة 10 اشهر باش يوجدو دراسة كاملة للوزارة ويقتارحو عليها الطريقة باش هاد الاقتصاد يولي فاعل اساسي فالاقتصاد الوطني.
وحسب مصدر "كود" فتمويل هاد الدراسة من اولها لاخرها ماشي من وزارة السياحة ولا حتى الدولة المغربية بل تمولها الوكالة الفرنسية للتنمية.
حسب مصدر "كود" فحجم التمويل غادي يكون فحدود 390 مليون سنتيم اي 3 مليون و900 الف درهم.
واكدت مصادر "كود" ان هاد المكتبين بجوجهم ديال مغاربة وكيسيروهم مغاربة وكيخلصو ضرائب للدولة المغربية ماشي "ماكنسي" او غيرو من المكاتب الاجنبية اللي ما كتخلصش الضرائب للبلاد.
طبعا بعد ما توجد الدراسة وتقدم مقترحات الوزارة باطرها غادية توجد اطار قانون وتقدمو للامانة العامة للحكومة وهي اللي غادية دير خدمتها اللي خاصها ديرها فهاد الحالات.