جامعة الحسن الأول غادي دير مجلس تأديبي لأساتذة "الجنس مقابل النقط" فالنهار اللي غادي تخل فيه العميدة الجديدة للكلية.. ومصدر من الوزارة ل"گود": الميراوي ماغديش يدوزها لهاد الاستاذة لي خرجو على كلية سطات

ترحيب خاص غادا ديرو جامعة الحسن الأول بسطات للعميدة الجديدة حسنة كجي، لي قالت مصادر "گود" أنها نهار الاثنين غادا تصبح عليهم تما دير جولة باش تتعرف عليهم قبل ما دير حفل تسليم السلط السيمانة الجاية مع العميد بالنيابة أحمد فحلي.
وفي هذا السياق قالت مصادر "كود "،ان المصيبة هي ان النهار لول لغتجي فيه هاد السيدة هو النهار لغتعقد فيه جامعة الحسن الأول المجلس التأديبي ضد أساتذة "الجنس مقابل النقط" ،وعلى رأسهم منسق ماستر المالية العامة لي سدوه ليه مني شمو فيه ريحت الخنز، وهاد المجلس هو الثاني من بعد المرة لولة لي مكملش فيها النصاب القانوني.
مصدر مقرب من عبد اللطيف الميراوي وزير التعليم العالي والبحث العلمي والابتكار، قال ل"گود" انو الوزير كاعي بسبب هاد الفضيحة وبلي مغاديش يتساهل ولا يتسامح مع هاد الأسماء لي وصلات هاد الجامعة لهاد الشي كلو.
حتى الرأي العام السطاتي راه ماباغيش يزيد يشوفهم فالكلية حيت ميمكنش للطلبة يرتاحو وهما غيقراو عند هاد الناس .