الزلزال لي ضرب القضاء فكازا واش غادي يكون نعمة على كفاءات القضاء المجتهدين اللي محطوطين فالثلاجة هادي سنين بسباب "لوسكي " وامثالو لي ساؤو لسمعة هاد السلطة ؟؟

اطلعنا ف "كود " على الحصريات فملف التسمسير فالقضاء لي ضرب المحكمة الابتدائية الزجرية ديال عين السبع، والريزو الكبير لي خدم عليه مكتب الهجرة غير الشرعية التابع للفرقة الوطنية للشرطة القضائية بالدار البيضاء، واليوم غادي نحاولو نتكلمو على النقمة والنعمة ديال هاد الفيلم..
نبداو بالنقمة لي هي المواطن اليوم مبقاش كيتيق في القضاء وفي المحاكم وفي عدالة قضيتو وان ملفو غادي يتحكم بالعدل، بسباب عصابة ديال الرشيوية والفاسدين لي منهم نائب وكيل الملك بالمحكمة الابتدائية الزجرية بعين السبع هشام لوسكي المضرب بثمنية السنوات ديال الحبس، وطبعا هاد العصابة هي لي طيحات البقية، لي منهم جلال نائب وكيل الملك بنفس المحكمة ومعاه مستشار بمحكمة الاستئناف بالدار البيضاء ديال كوماناف لي حتى هو مشدود دابا بسباب الرشوة لي قيمتها 30 ألف درهم في ملف طيحاتو لابين پيجي من بعد المكالمات الهاتفية.
ولكن كيف كيقولو كل نقمة الا وكتكون وراها نعمة وهاد الشي بالتحديد لي كيبان غادي يوقع، بحيث كتقول مصادر "گود" ان عدد كبير ديال القضاة ووكلاء الملك في ربوع المملكة غادا تعطاهم الكلمة لانهم نزهاء وكيستحقو وكانو مديورين في الفريگو والكلمة معطية للسمسارة من امثال هاد الوكيل.
فاذا هاد الشي يقدر يكون خير على المحاكم فالمغرب لانو جا الوقت باش الدولة ترجع الثقة للقضاء عند المواطن وهادوك المسؤولين لي عمرو فشي بلايص خاصهم يتبدلو وتعطى الفرصة لزملائهم في الدومين .
ومصادرنا كتأكد ان التحقيقات مزال غادي طيح شلا سمسارة فملفات قضائية اخرى .