البام فضل يدافع على نائبو اللي مسخر على الحكومة اللي عندو فيها 7 الوزرا. تجميد العضوية من المكتب السياسي تخربيقة واهانة لهاد الحكومة

حزب الاصالة والمعاصرة دافع على برلمانيه هشام لمهاجري اللي هاجم رئيس حكومة داخل فيها "البام" ب7 مناصب وزارية.
دابا هاد الهيلالة كلها ناضت واللي من الممكن طيح الحكومة كاع٬ اش خدا البام فاجتماع مكتبو السياسي اليوم بالرباط؟ تجميد عضوية صاحبنا ماشي من الحزب. اللا. من المكتب السياسي. صافي لا غير.
الحزب دار بزافت الانشاء فهاد الموضوع اللي حتى شكلا جا فالفقرات الاخيرة للبيان الصادر اليوم الاثنين 14 نونبر 2022. كتب هاد الفقرة:
"وفي نفس السياق، وتقديرا منا لحجم المسؤولية الدستورية و السياسية والأخلاقية المتينة لحزبنا اتجاه شركائنا في الأغلبية الحكومية، والتزامنا الجماعي باحترام ميثاق الأغلبية، وقف المكتب السياسي عند تقرير رئاسة الفريق حول مداخلة هشام المهاجري النائب البرلماني في صفوف فريق الحزب بمجلس النواب الأخيرة، والتي عبرت بالملموس عن مسه بمبادئ وقوانين وتوجيهات الحزب فيما يتعلق بالتحالفات، وعدم احترامه للالتزام السياسي والدستوري الذي يربط حزبنا بالأغلبية، فتقرر تجميد عضوية النائب البرلماني المعني من المكتب السياسي، وإحالة ملفه على المؤسسة الحزبية المعنية بالتحكيم والأخلاقيات".
واش الالترام السياسي والدستوري مع هاد الحكومة يالله يستاحق "تجميد العضوية من المكتب السياسي"؟ كيفاش الحزب قدر تبعات هاد التصريح؟
بهاد الموقف راه البام كيساند صاحبو هشام لمهاجري ضد الحكومة. حتى الاحالة على لجنة التحكيم والاخلاقيات غير ربح للوقت.
دابا كان خاص ماشي غير تجمد عضوية٬ هاد نائب شيشاوة من الحزب، اللي كان خاص هو الطرد باش يكون عندها تبعات مباشرة على رئاستو للجنة الداخلية فمجلس النواب.
الحزب ما قدرش يوصل لهاد المرحلة. بقى كيلعب بالكلمات ودار قرار عادي لحادث خطير جدا