الأسطورة بيلي تكلم مع العالم من وسط السبيطار اللي ناعس فيه حيث حالتو صعيبة

خرج أسطورة كرة القدم العالمية بيلي باش يطمئن الجمهور ديالو اللي مخلوع عليه من بعدما دخلوه للسبيطار حيث الحالة الصحية ديال تدهورات بزاف بسبب مرض السرطان.
بيلي اللي ناعس فواحد القسم ديال العناية الخاص بالحالات الميؤوس منها حسب الإعلام البرازيلي، وجه ميساج فحساباتو على مواقع التواصل الاجتماعي، للمتابعين ديالو وكتب: "صحابي أن راني باغي نحافظ على الهدوء ديالهم، راني قوي وعندي بزاف من الأمل وكنتبع العلاج ديالي".
وكمل بيلي الكلام ديالو وقال: "كنشكر الفريق الطبي كامل اللي مقابليني على الرعاية اللي عطاوني، عندي إيماني فالله وأي ميساج ديال الحب كيوصلني منكم فجميع أنحاء العالم كيخلي عندي الطاقة، وحتى ملي كنشوف البرازيل لاعبة فكأس العالم، وكنشكركم كاملين''.
ودخل بيلي اللي عندو 82 عام وربح كأس العالم 3 مرات مع البرازيل، للسبيطار فبلادو، بسبب مرض السرطان اللي كيعاني منو، وحسب الإعلام البرازيلي فالجسم ديالو ما بقاش كيتجاوب مع العلاج الكيميائي اللي كايخد ضد سرطان القولون اللي كيعاني منو.