المنتخب سخن جيب الجامعة وضمن لها 25 مليار

ضمنت الجامعة الملكية المغربية لكرة القدم مبلغ 25 مليون دولار، من بعدما تأهل المنتخب الوطني المغربي إلى نصف نهائي كأس العالم قطر 2022، ملي ربح منتخب البرتغال فربع نهائي البطولة، وغادي يلعب ضد فرنسا فالمربع الذهبي على التأهل للفينال.
وقدر المنتخب الوطني المغربي يحسم التأهل لنصف نهائي كأس العالم قطر 2022 ، وبالتالي ضمن الحصول على الأقل على مبلغ 25 مليون دولار، وهي الجائزة اللي مخصصها الإتحاد الدولي لكرة القدم "الفيفا" للمنتخب اللي غادي يحتل المركز الرابعة أما صاحب المركز الثالث غادي ياخد مبلغ 27 مليون دولار.
وأما فحالة تأهل المنتخب الوطني المغربي إلى نهائي كأس العالم فغادي ترتفع الجائزة إلى 30 مليون دولار على الأقل وهو المبلغ المخصص لوصيف بطل العالم، فالوقت اللي غادي يربح المتوح بكاس العالم قطر 2022، مبلغ 42 مليون دولار.
وخصصت "الفيفا" مبلغ 9 مليون دولار للمنتخبات اللي لعبت لكروبات فكأس العالم قطر 2022، والمنتخبات اللي وصلت لثمن النهائي كتزادها 4 المليون دولار وبالتالي كتصبح 13 مليون دولار، ثم المنتخبات اللي كتوصل لربع النهائي كترتفع عندها الجائزة لمبلغ 17 مليون دولار، وصاحب المركز الرابع عندو 25 مليون دولار، والمركز الثالث 27 مليون دولار والوصيف 30 مليون دولار والبطل اللي غادي يهز كأس العالم غادي ياخد 42 مليون دولار.