المحمدية دارو مفاجأة فدونور وربحو الوداد اللي ضيع فرصة تقليص الفارق مع الصدارة

خسر فريق الوداد الرياضي الماتش الثاني له على التوالي وأول لقاء تحت قيادة المدرب الجديد المهدي النفتي، بهزيمتو أمام شباب المحمدية بقلب ستاد دونور اليوم الخميس ضمن الجولة 10 من منافسات البطولة الاحترافية لكرة القدم.
الشوط الأول سالا ما بين الفريقين بالتعادل السلبي بالرغم من أن الوداد الرياضي حاول يضغط باش يضرب الهدف الأول ولكن ما كانش موفق وتعقادات عندو الأمور من بعدما تطرد له جلال الداودي اللي خدا حمرا نيشان بسبب تدخل متهور.
مع بداية الشوط الثاني استغل شباب المحمدية النقص العددي ديال الحمرا وضرب عليهم الهدف فالدقيقة 46 عن طريق مروان زيلا، وحاولو من بعدها الوداد يرجعو فالنتيجة ولكن ما قدروش، حيث لبلوك ديال المحمدية كان قوي وحتى الطرد ديال الداودي جلال أثر بالرغم من محاولات المدرب النفتي باش يعطي حيوية لوسط التيران والهجوم بالتغييرات اللي قام بها، ولكن شباب المحمدية قدرو يقتلو الماتش بهدف ثاني فالدقيقة 86 عن حمزة الواسطي، وقلصوا الوداد الفارق من بعد منها بهدف ماركاه أيمن الحسوني من بلانتي ولكن ماكانش كافي وسالا الماتش بنتيجة 2 لواحد.
وضيع الوداد الرياضي بهاد الهزيمة فرصة تقليص الفارق مع صدارة البطولة وضيع حتى المركز الثاني حيث الفاريق تراجع للمركز الثالث وظلت عندو 18 نقطة فالرصيد ديالو، فالوقت اللي رفع شباب المحمدية رصيدو إلى 14 نقطة وصعد المركز 6.