العْسْلْ

http://www.elmayssa.com

مغرب الأمس.. مغرب اليوم.. مغرب الغد.. مغرب مَّالِيه..

علي زوا.. قال الحياة..

أَرْمي الكُورة رْمي..

كَايْنة الخدمة؟
كاين الكبت
نهار السبت
أفين أ الزّين؟
أ تِيوالّين؟

كاينة الخدمة؟
كاينة عْشيوَة
خاصُّو قْهيوة
عطيني نعطيك
الهْدرة فُودْنيك

كاينة الخدمة؟
كاين السّْم
قْشّ مْرْزّم
زايد ناقص
كي شْوِيّش دالهم
فايق ناعس
غي كيشمشم

كاينة الخدمة؟
وكَتْسُوُّل بلا حْشمة!
كاين غي الفْنّْ
دْشّن دْشّن
وزيد دشّن
حتى ربي يْحّن

أشْكَدّشّنو تْمّا؟
واش وْصلاتكوم شي حاجا؟
هنا وَالو!

قالّك تونس
ثورة الحُب
والله لا طْفّرتوه يا العرب

قالّك تونس
أشْمن ثورة؟
مْشَا واحد يْجِيو عشرة

قالّك مغرِب
جِيبِي الحْبيب
كَنصرف ونْتّكّوى

قالّك مغرب
عربي ونْجيب
العرب رَاه واكْلين الشّْوا

والأمازيغ
بالفُورْفِي نْزِيغ
لِّلي مشَا البَارحْ هَاهُوَ جَا

والأمازيغ يَا الأمازيغ
أ مَايْتْعْنِيتْ أ بَّا يْجَّا

أرمي الكورة رمي..

مغرب الأمس
عَامْرْ بالنّْمْسْ
طْلقو بْزيزْ وشْدُّوا بِازْ

مغرب اليُومْ
فْالكْرِيدي نْعُوم
بَاعُو الضُو وشْرَاو الچَاز

مغرب الغد
للِّي رْخَاليك شْدّ
عْنداك يْرْخِيو ليك بُوطْزطاز

مغرب الغد وفِينا حْصْلْ
الشّفَار دْالفيلم هو البطل
قالها زمان علي حسن

مغرب الغد وْبْلا خْدْمة
اتّكَّا شْوِيّة هْزّك المَا
حَابَا تْسَالاَت، رَاسك كَيْبَانْ

للّي بْغَا الدنيا يْعُومْ لْهِيه
يُوصْلْ ويْنشّفْ رْجْلِيه
ويقول سَلَمَاتْ أ بلادي

للِّي بْغَا الآخْرَة يمشي لغْزَّة
ويكون راجل طَارْتْ معْزَة
ويْشْهّد لينا وْهُوَّ غَادِي

وللّي بْقا هنا.. راه بَاقي هنا
هَا بلادك يَالاّه كُولْها
دِير كْسْكْسُو بالحنّة
وعْرْض الجّنِّيَّة وغُولْها

وْللّي بْقا هْنا وَا شُوف فِيَّا
وَاخّا مْزُوّقْ دَايْر النِّيّة
شعب كي منديل صْفِّيَّة
جِيتْ نْمْسْح فيه مْسْح فِيَّا

وْللِّي بْقَا هْنا مْسْكين عْمَى
بْنَاتُو تْرْجّلُو وْ وْلادو بَارُوا
مْللّي عْيَا وْمالْقَا خْدمة
نَاض كَيْدْشّن باب دَارُو

وَا ارْمي الكورة رمي..

مايسة
http://www.elmayssa.com
mayssa.salama@yahoo.fr