تسييج وتهيئة المقابر بالمحمدية ب ازيد من: 53 مليون سنتيم.. و40 درهم ، اش هذا ؟؟

لقاء يومي متجدد على محمدية بريس


تسييج وتهيئة المقابر بالمحمدية ب ازيد من:
53 مليون سنتيم.. و40 درهم ، اش هذا ؟؟
اليوم في اللقاء اليومي جوج كلمات: موضوعنا ما جا في لوحة الجماعة اللي منصوبة في عدد من الساحات حول المشاريع تاعها ، تسييج وتهيئة المقابر بمبلغ 533.040.00 اي ازيد من 53 مليون سنتيم و 40 درهم نعم 40 درهم .
محمدية بريس زارت الروضة تاع المحمدية : الروضة الجديدة والروضة لقديمة ، اشنو التعديلات اللي ضافو ليهم او ماسمي بتسييج وتهيئة المقابر ب 53 مليون سنتيم و 66 الف و 40 درهم اش تسيج واش تهيا ؟
سؤال كان بلا مانطرحوه ونتاملوه ، مصادر لينا قالت ، السور تاع الروضة لقديمة والجديدة في حالة جد جد جيدة ، ومبني بطريقة لاتشبهها اي مقبرة بالدارالبيضاء كالشهداء الاسوار في الروضات تاع المحمدية صراحة مبنيين ببناء تاع الدوام وتاع النفس اذن عن اي تسييج تحدتو الجماعيين تاعنا اللهم صباغة بالجير ،هي اللي طالت السور تاع الروضة الجديدة وفقط من الداخل قبل شهر، وممكن اي شخص يطل عليها داب ويشوفها كي ولات ،
اما الحديث عن تهيئة المقابر فحدث ولا حرج التعديلات اللي طالو الروضة لقديمة والروضة الجديدة ، الروضة الجديدة تعديلات اللي طالوها هو بابجديد ، ازالة الباب القديم اللي كان في حالة جيدة حسب المصادر وخداو منو لخرسا كي ماكتشوفو ولصقوها في الباب الجديد ، اوا شوفو الباب الجديد بعد الترقاع وشوفو الجودة ديالو ، اوا هذا باب تاع الروضة ؟ شحال غ يعمر ؟ كنظن مايطولش بسبب عوامل كثيرة.
الروضة القديمة هي الاخرى حضيت فيما يسمى بالتهيئة، بباب شبيه لصاحبنا وتم ضرب جير للحيوط حداه اما الصور تاع الروضة لقديمة ماتجير ما تقاس ، وهو طبعا مايحتاش ابدا يتغير، او يتعدل ، او يتسيج ،بتاتا روضة قديمة فيها موتى الله يرحمهم مدفونين من زمان تما باغين ع الراحة وتا حد ماقاسهم وتا حد ما نقز ليهم من السور تاعها .
اذن اش بان ليكم اسيادنا ؟ تسييج وتهيئة المقابر بازيد من 53 مليون سنتيم ؟ هل من رد ؟ وهل من تعليق ؟

نتلاقاو غدا في الصباح فجوج كلمات وموضوع جديد.
لمن فاتته مشاهدة حلقة امس من اللقاء اليومي : جوج كلمات يرجى الضعط هنا
واللي ماشافش موضوع النافورة يضغط هنا
ولمشاهدة باقي الحلقات الماضية يرجى الرجوع الى القائمة الرئيسية
بالموقع والضغط على فقرة جوج كلمات