10 خطوات للتصويت من أجل تيزنيت

بغيتي تصوت، تخلطات عليك الألوان والرموز والكمارات والشعارات والتجمعات.. تلفتي ماعرفتيش أش تدير.. شد معانا الأرض، وآجي نتعاونو على اختيار المرشح واللائحة المناسبة اللي غادي تخدم بصح مدينتك، ماشي "الخدمة" لي على بالك:
1- ماتصوتش على وكيل لائحة أو وكيلة لائحة (وكيل اللائحة هو لي كاين فراس الليستا) أنت عارف مسبقا انه فاسد ومرتبط بلوبيات الفساد.. ماتكونيش عندك ذاكرة السلاحف أولا فيك الزهايمر.. ماتنساش بالعربية تاعرابت!
2- ماتصوتش على لائحة أحزاب كتعرف أنهم مدعمين من لوبي الفساد والعقار بتيزنيت، زعما هما دوك الشفارة و الرشايوية الِّلي كايهرفو على أراضي المواطنين و الفقراء.. هذه الاحزاب إلا صوتي عليها و طلعات غادي تدافع على مصالح هاد العصابات لي هي لوبي الفساد والعقار، وعلى حساب مصالح المدينة و المواطنين لي مافحالهوم..يعني ساحة الاستقبال غادي إردوها تجزئة، ودار ثقافة غادي تلقاها مارشي!
3- ماتصوتش على وكيل لائحة أو وكيلة لائحة لي أنت عارفهوم مايقدروش إقولو لا للعامل، أو ماعندوهومش السنطيحة و الجرأة والشجاعة قدام سلطة الوصاية اللي هي وزارة الداخلية ( القايد و الباشا و العامل و الوالي و وزير الداخلية…)، يعني قول لا للتحكم والفساد .
4- ماتصوتش على لائحة، كاتشوف بلي ميزانية الحملة نتاعهوم اكبر من الدعم العمومي اللي كايشدوه عادة الأحزاب، وِ إِلا بان ليك شي حد فالمرشحين طالق اللعاقة مزيان، عرفو غادي إردها على ظهرك نهار اطلع للبلدية !
5_ ماتصوتش على وكيل لائحة أو وكيلة لائحة ما مستقرش في تيزنيت.. ماساكنش أو ماساكناش هنا مع عائلتهوم.. لان البلدية هي القرب اليومي من المواطن ،حِيث بغينيا منتخبين اللي نلقاوهوم حدانا ومعنا نهار تحاصرنا الفيضانات، إلبسوا البوط وينزلو للغيس.. ماشي إتابعوا خبارنا فا الفايسبوك والتلفزة والواتساپ !
6- ما تصوتش على وكيل لائحة أو وكيلة لائحة عندهوم بزاف د المهام والمسؤوليات..حيث هو أو حيث هي مامسالينش ليك!
7- ماتصوتش على مرشحين كيشريو الأصوات .. اللي عطاك 100 درهم أو قفة قبل الانتخابات أُولّا فيامات الانتخابات، وجا عندك دابا بغا صوتك، عرفو نصاب بغا إرد في المجلس البلدي داكشي اللي خسر عليك!
8- ما تصوتش على وكيل لائحة حزبية بان ليك البرنامج ديالو خاوي أو خيالي و ماعندوش علاقة بالواقع ديال المدينة، وأنه ماعندوش فريق عمل لتسيير البلدبة.. .
9_ ماتصوتش على حزب ماعندوش تنظيم وأجهزة حزبية، اللي غادي تساعدك على محاسبة المنتخبين ديالو وتراقب الأداء ديالهوم في البلدية.. يعني الاحزاب لي كاتكون غابرة 5 سنين ماكاتبان غ من انتخابات لانتخابات.
10- سير صوت، وأنت متيقن أن صوتك مهم باش تبني مدينك و مستقبل ولادك.!