رعشة

قالو: سوريا
قلنا: الشام
طبعتنا خلات من قديم
تنقشات ف باحات رسومها
قلادة من حبات الرخام
عناقدها تبكي ب الضيم
خيم الضباب حجب نجومها
طاح الرعد وشمها وشام
راب الدم حقنو ب الميم
سوك لفام ب سمومها
ما قدر الشام عل السلام
كيف تدوي ب الجيم
طلاتو كدرة ب حمومها
قالو: الضباب يلطف السخونة
قلنا: الضباب من سعد المعفونة
*******
قالو: سوريا
قلنا: مسك الظاء
رقبتها لوات
ف ترابها تورك وتبرك
خصبتها ب الموت والرقاد
والموت ف حواجبها تلات
لمقوصة من شفارها تحسك
تنين ب جذر ما يسقيه لمداد
ولمداد صيفو تحصد ب المحراث
ب قلام تسبح ب الإيمان والشرك
ف كتابها لحروف مطارق الحداد
ما برد دكها لا دجلة ولا والفرات
قالو: زينا ف حروفو
قلنا: وعيبنا ماكاد تشوفو
قالو: سوريا
قلنا: علامنا ف الشرق
عوينة صابتو
ما مكتوب مقدر
ربيع خرف ف سبوعو
كا ن مورق ف صباتو
ف الشتا والصيف يتحير
ب خدود النعمان ف ربوعو
تكمش الفرات. الكلسة مارامتو
رعشة ف العاصي سخن وتزير
بكا الليل عل لفجر وطلوعو
اليرموك ب ماه ندب حالتو
ثالوث ب جنون الشام تشير
كان صبو ف لبحور عسل ب دموعو
ولبحور عطشانة فحلاوتو
نشف الشهد وجهو تغير
هجمت ب مواج مالحة على خشوعو
ولبحور من صبها قالتو
قالو: قطع الواد اللي باينة حجارو
قلنا: ليلنا مابغي يطع نهارو
**************
قلب لعرب ما بقى يضخ
دمو ف ماه كلشي يسبح
ف لارض ولا فالسطوحة
وف لعروق حال مابقى يطبخ
حقن ب لمخيط وب لمقدة شرح
وعلنو كديد خناز ب لملوحة
عطربه ف لقبايل ل يفيق الرخ
يلقمو ب لمسوس ولمدرح
يفرخ بيضو بلا محوحة
قالو: الخواف ماتخاف عليه مو
قلنا: ب خوفو دفن اللي ليه وعدمو