شادها السخانة

وصل العيد عاوتاني ياله كتبدا تأكل اللقمة الأولى ديال الحولي ٬بعدما شريتيه بالسطارطير 00 تتشعل التلافة تي بدوا عليك بالإشهارات ديال الفقسة 000
قهرونا بالإشهارات ديال الصحة ٬ ولي سمعهم يقول هذوا غادي تمشي لسبيطار تلقاهم كيتسنو فيك بالورد والفل والياسمين ٬ و حنا عدنا كنسمعوا لعيالات كيولدوا غير قدام السبيطارات 00
والله وتمرض وتمشي لسبيطار ديال الدولة ٬ حتى تموت وانت غير في قاعة الإنتظار هذا لخلوك تدخل ليها بعدا000
حيت ديما ماكينش بلاصه وماكيجي الطبيب حتى الأخر ديال النهار٬ والا جى كيجلس غير ساعة حيت هو دكتور طبعا والأطباء عندنا كيخدموا ساعة في النهار ﴿حيت قراو بزاف سبع سنيين من بعد الباك ﴾وخاصهم يخرجوها منا هذيك السبع السنين
هذا الصحة عندنا مريضة بزاف شادها السخانة ٬ كدخل لأكبر سبيطار في المغرب وطبعا مكنقصدش ابن رشد كتوضر نص النهار ٬ من واحد لواحد مني كتوصل أخيرا للمكتب الي بغيتي كيعطوك موعد بعد ستة اشهر وانت في حالة مستعجلة جدا ٬ كيبقى قدامك خيارين اما أنك تنتحار أو انك تنتحار 00
اف000 يله سالينا من اشهارات السكن في رمضان ٬جابوا لينا اشهارات السرطان في العيد الكبير و بيخيييييييييييييييييييييييير ٬٬ دابا هما كيسحبون عايشين وما بقى لينا غير السكن والصحة ٬ واحنا ماكنبشو لسبيطار حتى كنزحفوا وما كنبقوش قادرين نوضو
والسكن عندنا عالللللللللللللللللللللللللللللللللللللللللم كتلقى عائلة في زوج بيوت ب ثلاثين الف ريال لشهر ٬ والأب كيخدم نهار وليل غير على الكراء والماء والضوء00
كيفيق من ستة الصباح كي الفروج كيمشي ال طوبيس يتعلق فيه كي طير بڴر ٬كيضل يحرث فابور 00 كيرجع كيلقى الدري مضارب في الزنقة ٬والبنت كتشاتي مع ربعة الاف واحد في الفيس بوك وطبعا ديرا في البروفيل تصويرت سمر
00
كيشعل مسكين التلافة كيلقى واحد المغنية مقدا ومصيبة وديرا كيلو ديال المكياج تتغني ليه الكراء بتمن الشراء 00
في أي دولة في العالم كتسول الشباب على الحلم ديالهم ٬ كاملين كيجوبوك ت يقولو الحلم الأمريكي يعني بيت وسيارة ٬ واحنا كتجي كتسول أي قرد زعما فرد واخا يكون عمرو تناش العام كيقول لك كنطلب الله يعطينا شي موتة مستورة وصافي ٬ يعني طوب ديال أحلامنا هو موتة مستورة
اليوم مع الصباح شعل شي واحد في الدار هذيك التلافة ٬حيت انا صافي درت عليها كروة حمرة0 اول ما غادي نسمع سمعت اربع بنات خدج اتزادوا في أزيلال ٬ ونقلوهم للكازا٬ حيث ماعندهمش ربعة القراعي يعني الحاضنات ٬ وطبعا اكيد في الطريق ضروري ما تموت منهم شي وحدة مسكينة٬ حيث انا الشارفة الا شديت الطريق وانا صحيحة في أي وسيلة من وسائل النقل ديالنا كتشندي الدوخة يوميين عاد كنفيق من كترة هز ردخ ديال الطرقان ٬ عاد مسكينات هدوك البنات واش هذا سبيطار ديال الولادة !! الي ما فيه حيت القراعي كون غير جمعنا ليهم غير درهم درهم لواحد كون جمعنا ليهم ثلاثين مليون الدرهم ٬ ومع دابا العيد غادي نجمعوا ليهم قديدة قديدة لواحد
أنا أسفه لأن النص مكتوب بالعامية المغربية لكنها تبقى لهجتي العروبية التي أعتز بها ولأني لا أكتب جملة مفيدة بالعربية من دون أخطاء فاعذروا جهلي
و أخيرا ﴿ الله يعطينا شي موتة مستورة ٬ والله يقاد العمر مع الصحة حيت ما كين على من غادي تكى في هذا الزمان ﴾
عزيزة بلقيس
في ‏12‏-11‏-2011