أعلن سيمبا التنزاني عن توقيت انطلاق الماتش ديالو ضد الوداد الرياضي اللي غيتلب السبت الجاي بدار السلام، برسم ذهاب ربع نهائي عصبة أبطال إفريقيا. وكشف سيمبا التنزاني عن التوقيت ديال الماتش وسط جدل كبير حيث كان الفريق التنزاني راسل الكاف من أجل تغيير التوقيت من 4 ديال العاصر بتوقيت تنزانيا إلى 10 الليل أي من 1 الظهر بتوقيت المغرب إلى 7 العشية. سيمبا التنزاني علن على توقيت إنطلاق الماتش على لاباج ديلو بفيسبوك ولكن بتوقيت ماشي مألوف ونادر الشي اللي خلق جدل أكثر وسط الجماهير، وأكد الفريق التنزاني أن الماتش غيبدا مع 10 بتوقيت السواحلية JIONI. وحسب شي مغاربة عايشين بتنزانيا فالتوقيت السواحلي مختلف على باقي مواقيت العالم في طريقة تحديد الساعات ديالو حيث فالتوقيت السواحلي بداية فالفترة الصباحية am من اليوم، كتبدا مع الساعة 6 صباحا (غرينتش+ 6 am)، والفترة المسائية pm كتبدا مع 6 مساء (غرينتش + 6 pm)، وهذا هو توقيت السواحلية وكيخدمو به بلدان جنوب شرق إفريقيا وشائع عندهم. سيمبا التنزاني علن على أن الماتش ضد الوداد الرياضي غيبدا مع 10 JIONI (السواحلية) وهي 4 العشية بتنزانيا (غرينتش+ 4)، أي الساعة 1 الظهر بتوقيت كرينتش، وهو التوقيت المعتمد حاليا بالمغرب أي أن الموعد اللي كان لانطلاق الماتش هو اللي مازال.
