باجات الفيسبوك محيح على بودريقة.. كيعيبو على الانتدابات ومستغلين الجمهور

كيبان أن العلاقة بين محمد بودريقة رئيس الرجاء الرياضي وصحاب باجات مواقع التواصل الاجتماعي، اللي كيدعيوه حبهم للفريق بدات كتوثر مع اقتراب الميركاتو من النهاية ديالو.
وناضو شي باجات بفيسبوك كيدعيو حبهم للرجاء دايرين حملة جديدة باغيين من خلالها يضغطو على محمد بودريقة رئيس النادي، بداعي أن الفريق خاصو انتدابات أخرى يعزز بها الصفوف ديالو، وأن اللاعبين الجداد اللي سنا معهم خلال الأسابيع الماضية ما عندهم قيمة بلا مهاجم راس حربة سوبر كيف كيوصوفوه.
الأكثر من هذا فهاد ليباج وبالمعلومات اللي كينشرو على مواقع التواصل الاجتماعي بداو كيخلقو واحد انعدام الثقة بين المكتب ديال بودريقة والجماهير، ولو أن النادي فكل مرة كيخرج يتواصل سوى بندوة صحافية أو ببلاغ يشرح شنو واقع، وآخرها كان قبل ساعات من خلال الكشف على معطيات صفقة انتقال اللاعب محمود بنتيك من الفريق الأخضر إلى سانتي ايتيان الفرنسي.
عدد من الباجات الرجاوية محيحين على بودريقة، باش يزيد يسني مع لاعبين آخرين خلال هذا الميركاتو، وكل مرة كيشدوه من صفقة اللاعب الجنوب إفريقي هاشم دومينكو، اللي ما كيلعبش حيث موعت وكاين اللي فيهم كيطالب من الفريق يفسخ معه، والأكثر من هذا كاين اللي وصفو بأول ليتيش لبودريقة خلال هذه المرحلة الثانية اللي كيترأس فيها الرجاء.
الغريب فالأمر هو أنه كاينين ديباج اللي من هادو اللي نايضين لبودريقة، كانو غير الصيف الماضي كيدافعو على المكتب السابق برئاسة عزيز البدراوي رغم الصفقات الفاشلة د اللاعبين اللي جاب، وغرق الفريق فالنزاعات وغيرها، ولكن كانو كيحاولو ما فجهدهم يسرحو الجمهور ويقولو له صبر، راه غتدور الكرة وتزيان الفرقة وفالأخير النتيجة كانت باينة وهي زيرو لقب، والغياب عن المشاركة الإفريقية.
من جهة اخرى، أكد مصدر من الرجاء الرياضي أن النادي مازال ما سالاش التعاقدات خلال هذه المرحلة، وباغي يعزز صفوف الفريق بثلاثة لاعبين آخرين على الأقل، ومركزين على مهاجم ولا جوج، بالإضافة إلى صانع ألعاب وشي ظهير، وراه كاينة منافسة كبيرة حيث ماشي غير الرجاء اللي كيفاوضو نفس الأسماء ولكن كاينين فرق من البطولة وبرا كيتنافسو على انتداب نفس اللاعبين.