عادة العشا و 3 ايام فالعزو تقاليد خصها تغبر وتنقرض فالمغرب.. علاش منديروش فحال العزايا الاوروبيين كيمشيو للقبر يعزيو بالورد وفالعشية يضربو كويسات ولا فحال دول الشرق كيشربو قهيوة ويعزيو بلا مرقة بلا تغماس

تناولت وسائل اعلامية أن ساكنة جماعة المرس بإقليم بولمان تجمعو مع قبايل حداهم وقررو يحبسو العادة ديال العشا فالعزو باش يخففو على أهالي المتوفين.
وهادي بادرة زوينة اللي مكرهناش تتعمم لانه الطريقة باش كيتعاش العزو فالمغرب كارثية حيث من ديما كنتساءل مع راسي الى شي حد مات ليه واحد فواليديه ولا شي حد عزيز عليا واش غيقدر مزال ينوض ويوقف عند مول الهري باش يشوف واش ياخد الطعام الرقيق ولا الغليض ويدوز عند مول دلاح والعنب والتفاح ومول اللحم والدجاج ويبقا يتجارا يقلب على طباخة ولا تريتور فأحسن الظروف ويجري ويشوف شحال من طبلة وشكون كلا وشكون ماكلاش وشكون تغطا وشكون ماتغطاش ويضايف الناس اللي مخيمين عندو ويشوف واش فطرو واش تغداو واش تعشاو وهوما عاد كتحلا ليهم اماكلة وكيقولك ماكلة العزو بنينة.
راه بصح خص تدار إعادة النظر فثقافة العزو فالمغرب حيث مكيخليوش بنادم يعيش الحزن ديالو فراحتو ويبكي ويفرغ ويستوعب وكيخليو تركيزو مشتت على ديك الفاجعة ومكيعيشهاش فساعتها وكيبقا مرفوع حتى كيفوت العزو ويتصبنو طلامط والكواش ويتخمل كلشي عاد كطلع معاه باه مات ولا مو ماتت.
وعاد كاينة واحد الفئة اللي حتى هي خص يتهضر عليها اللي مكتحسش بيك لاشوي لابزاف وكتبقا تتدخل ليك فكفاش تعيش الحزن ديالك ها اللي كيقولك لامتبكيش راك كتحرقو فقبرو وهاللي يقولك خرج من البيت لعند العزايا هضر معاهم وجلس معاهم حشومة وواحد الفئة اللي مكتخليكش تشوف اللي مات ليك وتودعو بسلام ولا توصل معاه القبر لاسيما الى كنتي امرأة، ونتا فقمة الحزن والانهيار كتجي عندك الطباخة باش تقولك راه الدجاج ماكفاش ولا زيد الديسير ولا راه فلانة بغات تدي لعمتها حقها ديال الدجاج والكاطو شنو ندير...