لابين پيجي قربات تسالي لونكيط فملف اختلاس أموال عمومية بطلها الرئيس القديم لجامعة الحسن الأول فسطات.. مصدر ل"گود": مكينش غا بوحدو معه مسؤولين اخرين

علمت "گود" أن عناصر الفرقة الوطنية للشرطة القضائية بالدار البيضاء قربات تسالي التحقيق مع (أ.ن) الرئيس الأسبق لجامعة الحسن الأول فقضية اختلاس أموال عمومية.
وكشف مصدر "گود" أن هاد الأموال كانت موضوع تقارير ديال المفتشية العامة التابعة لوزارة التعليم العالي والبحث العلمي والابتكار والمجلس الأعلى للحسابات، وتحالو على رئاسة النيابة العامة اللي بدورها أمرت الفرقة الوطنية للشرطة القضائية باش تبدا تأونكيطي فهاد الضوسي لي ثار بزاف ديال اللغط .
المصدر نفسو، قال بللي بزاف ديال المسؤولين تصنتات ليهم الفرقة الوطنية منهم عدد من رؤساء المؤسسات الجامعية وخصوصا (أ.ن) اللي راكم أموال كثيرة في ولايتين لرئاسته للجامعة، ثم التحقيق مع الرئيسة السابقة (خ ص)، اللي حتى هي مشات وجات بزاف دالمرات لشارع ابراهيم الروداني فكازا.
دابا الأبحاث منصبة على الفلوس فين مشات من بعد ما خرجات.
المصدر ذاته، قال بللي (أ.ن) فبزاف ديال المرات مكيحضرش لجلسات التحقيق وكيجيب ديما شواهد طبية واخا كيشوفوه الناس في لقاءات مامريضش.