تلاعبو فالسيستام ديال تسجيل الطلبة.. وكيل الملك فسطات هبط موظف في ENCG للكاردافي .. و مصدر "گود": لابيجي عندها تعليمات باش تعمق البحث مع موظف فالداخلية واخرين

كشفات مصادر خاصة ديال "گود" أن موظف جامعي بجامعة الحسن الأول فسطات، تابع للمدرسة الوطنية للتجارة والتسيير راه موجود دابا رهن تدابير الحراسة النظرية بمقر ولاية امن سطات بعد قرار من وكيل الملك بالمحكمة الابتدائية بسطات، اللي عطى اوامره باش توضع في لاكاردافي يتعمق البحث فضوسي ديال فضيحة تسجيل طالب بكلية العلوم القانونية والسياسية من السيستام أبوجي ديال المدرسة الوطنية للتجارة والتسيير .
فسياق متصل كشف مصدر "گود" ان موظف تابع لوزارة الداخلية تهو اعطا وكيل الملك تعليماته باش يعمقو معاه لابيجي ديال البوليس البحث او قدموه في حالة سراح حتى هو تجيد في هذا الضوسي ، ومعه وحدين آخرين تهم غادي استامعو لهم البوليس وتقدمو في حالة سراح .
المصدر نفسه قال ،ان هاد الملف خانز او غادي قدر اجيد واحد الريزو لي كان تتلاعب في تسجيلات الطالبة في السيستام ابوجي ديال المدرسة الوطنية لتجارة والتسيير او تيمشو اقراو في كليات الاخرين لي تابعين جامعة الحسن الاول بسطات ،مضيفا ان راه دبا عناصر الشرطة القضائية بولاية أمن سطات راها معمقة البحث مع هاد المعنيين في انتظار ما يسفر عن التحقيق بعدما كانت البوليس قدمهم اليوم قدام وكيل الملك في حالة سراح .