إلى ويحمان وهناوي... لي مادافعش على بلادو وماجاتوش الغيرة عليها مايمكنش يدافع على فلسطين

ويحمان وهناوي من بين الظواهر الصوتية المغربية لي بينوا العمى السياسي الكبير ديالهم في تفاعلهم مع الحرب في غزة، إلى درجة أن هناوي نشر بوسط في فايسبوك فيه ويحمان منتشي بأخذ صورة مع الشعبوي حفيد نيلسون مانديلا، أحد أكبر أعداء المغرب في إفريقيا، خلال ندوة تضامنية مع فلسطين نظمها هذا الحفيد الذي سبق له التهجم على المغرب.
نبداو بويحمان، المصاب بإسهال في نظريات المؤامرة. هاد السيد لي كايداعي الدفاع عن فلسطين جالس كايتصور بلا حشمة بلا حيا وبلا وعي سياسي مع شيف زوليفوليل لي كايتآمر فعليا على المغرب وبالعلالي مستغلا العلاقة المنوية التي تربطه بالمرحوم نيلسون مانديلا.
فياناير لي فات، هاد الحفيد ديال مانديلا دار اجترار ديال الهضرة ديال البوليزاريو خلال افتتاح كأس إفريقيا للمحليين ووصف المغرب بالمستعمر ودعا إلى "تحرير الصحراء"،
هاد الحفيد، حتا هو ظاهرة صوتية جنوب إفريقية، لي المؤهلات الوحيدة ديالو أنه حفيد نلسون مانديلا فين ما بانت ليه شكارة كايجري ليها، العام لي فات تهلاو فيه فإيران وعطاوه شي بركة وخلال الخطاب ديالو أثنى على البقرة الحلوب الجزائر.
بحال هاد الحفيد هوما لي حاكمين دابا فجنوب إفريقيا، حزب سالا مع الابارتايد، وخاصو قضية اتاجر بها واغطي بها على الفشل ديالو السياسي والدبلوماسي، وصلات بهم أنهم ماقادينش اوفرو الكهرباء بانتظام فدولة ياحسرة عضو في البريكس.
إلا كان ويحمان ماعارفش أن حفيد مانديلا حليف ديال بوليزاريو والجزائر وسبق ليه مهاجمة المغرب وكيعادي مغربية الصحراء فهادي كارثة وإلا كان عارف هادي فضيحة.
ويحمان سبق ليه أن برأ إيران وحزب الله من التعاون مع البوليزاريو، لي كان سبب في قطع العلاقات بين الرباط وطهران، وقال أنه لا يثق في بوريطة ويثق في نصر الله لي ساهم في قتل السنة وتدمير سوريا.
ماقام به ويحمان من تفاعل مع عدو صريح للمغرب يمكن وصفه بالعمى السياسي والإيديولوجي وهادشي معروفين بيه ناس ديال القومية العربية في المغرب واليسار الجذري العالمي لي ديما خاصهم قضية اناضلو بها كرأسمال سياسي. أش عطات هاد الندوات والخطابات لفلسطين من غير تغراق الشقف وتبياع لعجل للفلسطينيين؟
وباش ايجي واحد بحال هناوي، يعتبر نفسه رجل سياسي ينتمي إلى حزب عاقبه المغاربة في الانتخابات وينشر بكل فخر صور عدو للمغرب فهادي قمة الاستهتار بقضية الصحراء ومصالح المغرب. خاص ويحمان وهناوي ايكونو واضحين مع المغاربة وايجاوبونا واش نتوما ماعندكومش غيرة على بلادكم تصورو وتنشرو تصاور مع الأعداء؟؟
حفيد مانديلا ونظام جنوب إفريقيا المتاجرون في إرث مانديلا كايمثلو خطر على الجهد الديبلوماسي المغربي في قضية الصحراء.
مانديلا لي تدرب في المغرب ودعموه المغاربة خاصة المرحوم الخطيب ماعمرو قال العيب على المغرب وعارف بقيمة البلاد لي دعماتو وزار المغرب والتقى الحسن الثاني.
من حق ويحمان وهناوي ولي تابعينهوم فالمغرب اتضامنو مع فلسطين أمام غطرسة الالة الحربية واستهداف الأطفال من طرف الجيش الإسرائيلي ولكن علاش تجري حتى لجنوب إفريقيا لي حاكمينها أعداء الوطن باش تصور مع لي كايهاجمو بلادك؟ واش مكتحترموش قدسية قضية الصحرا لي عطاو عليها المغاربة أرواحهم؟
ما قام به ويحمان وهناوي استفزاز لمشاعر المغاربة الأحرار وماغادي انفعو فلسطين بوالو لأن لي مانفع بلادو مايمكنش انفع بلادات ناس آخرين.