واش فرانسا جابت شي جديد فموقفها من الصحرا؟ ولد النص: لا جديد فموقفها وما وصلات لا للموقف الاسباني ولا الامريكي وجابت انشائيات وصافي

وزير أوروبا والشؤون الخارجية الفرنسي، ستيفان سيجورني اكد اليوم فندوة صحافية بالرباط بوزارة الخارجية والتعاون دعم بلادو "الواضح والثابت" لمخطط الحكم الذاتي فالصحرا. واضاف باللي جات لوقيتة " لتحقيق تقدم في هذه القضية".
ناصر بوريطة وزير الشؤون الخارجية والتعاون الإفريقي والمغاربة المقيمين بالخارج٬ رد عليه فنفس الندوة باللي "العلاقات المغربية الفرنسية مدعوة إلى تجديد نفسها لتساير التطورات على الصعيدين الإقليمي والدولي". هاد الاجوبة كتبين كيفاش داز اللقاء.
بالنسبة للخبير العسكري والقيادي السابق فالبوليساريو العربي ولد النص٬ فراه ما كاين حتى شي موقف جديد لفرنسا من قضية الصحرا. ولد النص اوضح ان باريس "تدعم الحكم الذاتي وفنفس الوقت تدعم معاه مساعي الاطراف كاملة بما فيها مساعي المبعوث الخاص الى الصحرا واي طريقة سياسية تجيب الحل.
ولد النص اكد باللي كاين فرق كبير بين الموقف الاسباني الواضح وبين موقف فرنسا المتدبد٬ وعليه فما قالو وزير الخارجية فالرباط "لا جديد فيه"٬ بل "موقف مبهم عن قصد" باش يرضي اكثر من طرف٬ وهو ما اعتابرو ولد النص "عملية غريبة"٬ كديرها فرنسا باش ترضي جميع الاطراف وفالاخير ما كترضي حتى طرف.
الخبير العسكري والعارف بخبايا قضية الصحرا٬ بان اللي كيطمح ليه المغرب هو يكون "الحكم الذاتي هو الحل الوحيد الواقعي"٬ كيف بان فالموقف الاسباني او الاميركي.
الخبير ولد النص عد قرائن كتبين موقف المغرب من تصريحات وزير الخارجية. بللي كانت برودة فالتعامل وتأخرات وكالة المغرب العربي للانباء فنشر الخبر. كلشي كيبين باللي "فرنسا ما قدراتش لحد الان تخرج بموقف واضح داعم للحكم الذاتي بصفتو ماشي حل بل "الحل". يكون "الدعم الفعلي ماشي الانشائيات. فرنسا ما قدراتش توصل لهاد المستوى. ربما عندها حسابات اخرى فالمنطقة. ربما باغية تلعب شوية يختم العربي ولد النص