"مومو" كيحتاقر لمغاربة ومعاهم القضاء. بعد متابعتو فحالة سراح رجع يقدم برنامجو وماشي بعيد يدير لايڤ من محاكمتو

تصورو شي منشط اذاعي فشي دولة فالعالم٬ يتابع فحالة سراح بعد ما خلص 10 مليون كفالة فقضية خطيرة كتعلق باختلاق جريمة وهمية ونشر خبر زائف يمس بالإحساس بالأمن عند الشعب بواسطة الأنظمة المعلوماتية، وإهانة هيئة منظمة عبر الإدلاء ببيانات زائفة. هاد الشي كولو وبعد ساعات يرجع للانتين.
هاد الشي وقع مع مومو ديال "هيت راديو". هاد المنشط اللي عندو الروكور فعدد المخالفات من الهاكا٬ كيدوز دابا فالاذاعة وعاطي الصبع لكلشي.
كيقولو راه مسجل وكيتعاود. هادي اهانة كبيرة ومسؤول عليها مدير البث وزيد عليها مومو. خاص داك البرنامج يوقف فمرة بسبب لفضيحة اللي طاح فيها وكانت مورا اعتقال جوج أشخاص فحالة اعتقال ومتابعة "مومو" فحالة سراح.
"كود" كانت السباقة بالكشف على هاد القضية اللي كان البوليس فكازا كان فتح فيها بحث بعد تداول فيديو على نطاق واسع كيرجع للمحطة الإذاعية "هيت راديو" اللي خدام فيها المنشط الإذاعي "مومو".
أحد المتصلين بالراديو كيف كنا كشفنا كان كيقول أنه تعرض لشي عملية سرقة البورطابل ديالو مني كان كيتصل بيه، مؤكدا باللي البوليس لم يتفاعل مع الشكاية ديالو، لكن تبين أن داكشي كولو كذوب ومفبرك وعندو حتى شي أساس من الصحة. مصدر قريب من المحطة الإذاعية "هيت راديو" قال ل"كود" باللي مومو غادي يرجع للخدمة ديالو بشكل عادي فالساعات الجاية، لكن كيفاش أن هاذ الإذاعة تقبل بعودة واحد متابعة فقضية تابوها المغاربة ونوضات ضجة كبيرة. وماشي غير هادشي. "مومو" سبق وطيح هاد الإذاعة فعدد من لفضايح وكانت محط عقوبات من طرف الهاك. دبا خاص هاد السيد يوقف إلى حين يقول القضاء الكلمة الأخيرة ديالو، وإذاعة هيت راديو خاصها تعتذر للمستمعين ديالها.