مدير "لارام" الجديد غادي بالشركة للحيط. ما فيدوش وبارك كيفرق والمدراء لكبار طالع ليهم الدم والصغار كيديرو اضرابات

عبد الحميد عدو المدير العام اللي جابوه لواحدة من اهم الشركات المغربية "الخطوط الملكية المغربية" فبلاصة ادريس بنهيمة غادي بهاد الشركة للحيط. السيد تجربتو بسيطة دار المكتب المغربي للسياحة وفشل فيه وجرا عليه الوزير الحالي للسياحة لحسن حداد. اليوم بدات المشاكل باضراب المضيفين والمضيفات. لو ان الادارة الجديدة فيدها كون ما يوقعش هاد الاضراب.
لكن المدير العام ما هاموش الشركة والموظفين اللي فيها. مصادع مع الاطر وهمش بزاف حقاش كيعتقد انهم كانوا اتباع بنهيمة والحال ان الشركة واطرها العليا ما ديال حد راهم ديال الشركة.
المدير العام الجديد فرق عوض يجمع وقسم عوض يوحد والشركة كتاكل لعصا واللي بناه بنهيمة فسنوات كيهدم فيه بسرعة. السيد ما كيحترمش مدراء الشركة لكبار يمكن معقد حقاش البسيط فيهم عندو شهادة اكبر من شهادة البوص الجديد اللي مشى لميريكان وسد تلفونو فعز النشاط التجاري للشركة اي الصيف.
كيفاش مدير ما قدرش يستبق حدث الاضراب ويفتح قنوات الحوار. هاد الشي كيعني ان الفيستا ديال المنصب كبيرة عليه بزاف
حشومة وعار يكونوا عندنا ناس فالدولة كيقتارحو بحال هاد الشخص فادارة شركة بحال هادي.