باراكة ما تشوهو فينا وجيبو ولاد الصحرا يدافعو. جايبين بامية وإستقلالي متبوع بقضية وما عارفين لعيون من زاكورة وقلبو البرلمان الإفريقي حمام‎

إمتى غادي تنعلو الشيطان وتجيبو شي حد فالمستوى يدافع بالعقل على الوحدة الترابية للمملكة؟ إمتى غادي يقولكوم راسكوم تجيبو ولاد الصحرا يدافعو على الوحدة الترابية للمملكة فإفريقيا. هادشي راه فات لقياس وكل نهار كتزيد شوهتنا.
اليوم فإجتماع منطقة شمال افريقيا التابع لبرلمان عموم افريقيا، المنعقد بكيغالي الرواندية، جوج برلمانيين مانعرف كيفاش حتى جابوهوم للبرلمان دارو لينا فضيحة ما عمرها كانت، هاد الجوج ليهوما البرلمانية عن حزب الأصالة والمعاصرة مريم واحساة والبرلماني الاستقلالي عبد اللطيف أبدوح لي مكبتها فواقعة “كازينو السعدي” كان خاصهوم غا السطولة ديال الحمام باش يكملو الحفلة، وحيت ما عارفين والو وما عندهوم أي معطيات على الصحرا بداو كيدافعو على الوحدة الترابية بلغة الحمام ولغة السويقة والصراخ لي هو لغة الضعيف. آراها للغوات وصدَّرو صورة خايبة بزاف عن المغرب والمستوى ديال البرلمانيين ديالنا قدام دول شمال إفريقيا.
هاد الناس لي راس مالهوم لغوات وماهوم عارفين كوعو من بوعو شوهو بينا وخلاونا ضحكة، ماشي فقط أمام جيراننا، بل حتى فإفريقيا كاملة لي كنحاولو نرطبو معاها فيما يخص نزاع الصحراء.
علاش ما يداروش برلمانيين ولاد الصحرا ويتفتح ليهوم المجال يسجلو مواقف. علاش ما نجيبوش برلماني صحراوي عايش الملف وكيعاصرو يوميا من سنة 1973. علاش أسيدي ما نقطعوش مع هاد النوعية ديال البرلمانيين لي عزيز عليها القفز بالزانة.
راكوم غير كضحكو على ريوسكوم باراكة من التخربيق وقلة لحيا راه مصير وطن هذا ومقدسات دولة. ولي كيدافع عليها خاص تتوفر فيه بزااااف ديال الشروط منها يكون مقنع فهدرتو وزاوية معالجتو لملف الصحرا ويكون ولد التراب ماشي واحد ووحدة دون المستوى ما كيفرقوش بين زاكورة والعيون