سكاندال كبير بزاف ساهمو فيها رؤساء الجهات: كيحيدو الدعم على البترول وكيدعمو لكيروزين. كيفاش عطاو 250 مليون درهم ل”العربية” وخلاو شركة الدولة واخا عطاتهم عرض احسن وكيفاش الشعب كيدعم شركة اماراتية مشاركة فيها مريم بنصالح

فضيحة كبيرة بزاف. سكاندال ما كاينش حتى فشي دولة. جهات فالمغرب دارت اتفاقيات مع شركة “العربية للطيران المغرب” بقيمة قريبة ل250 مليون درهم باش تتكلف برحلات منخفضة التكلفة. وفق معطيات حصلت عليها “كود” فان الخطوط الملكية المغربية “لارام” اللي ديال الدولة٬ عطات عرض “احسن فالجودة وفالثمن” ولكن ختارو الاجانب. مصدر “كود” تساءل علاش هاد الشي ما عرفناش شكون وراهم.
للتاريخ كان الرئيس المدير العام السابق ادريس بنهمية رفض رفضا تاما يتم فتح خطوط لهاد الشركة “العربية” بين داكار والدار البيضاء ودخل مستشار ملكي وكعات احدى المساهمات في الشركة مريم بنصالح اللي كانت حينها فالباطرونا. مصادر ل”كود” كانت قالت باللي هادا كان سباب باش يجريو على بنهيمة وجابو واحد ما كيقولش اللا. ما كيهموش شركة الدولة وكيفضل ما يقلقش لمفرحين فهاد البلاد.
فضيحة “العربية للطيران بالمغرب” انها خدات الدار البيضاء الداخلة ب26 مليون درهم. كيفاش رئيس جهة قبل بحال هاد التخربيق. علاش قبل يدعم شركة خطوط اجنبية ماشي مغربية ودارت التحايل وخلقات شركة فالمغرب ودخلات لمغاربة باش تاخد رخصة للنقل. اش كيعني نقل صحافيين ومستكشفين والتسويق. فين هاد التسويق. ثم علاش جهات فقيرة بحال تافيلالت عوض ما تصايب الطرق خلصات فلوس كثيرة وتبعاتها جهات اخرى ومولات هاد المشروع جماعات حضرية
وفق مصادر “كود” ما كاينة حتى شي دولة فالعالم كتدعم دعم عمومي لشركة طيران خاصة وديال الاجانب. لا فمريكيان لا فرانسا لا اسبانيا لا تركيا لا مصر. كاينة لارام بهاد لفلوس كان ممكن تخلق شركة داخلية وتقوي شبكتها بهاد الدعم خصوصا انها قدمات عرض كما قال مصدر “كود” احسن بكثير من “العربية”
لفضيحة لكبيرة ان هاد العربية انشئت ف2003 بمرسوم من امير الشارقة اسمه سلطان بن محمد القاسمي وهي الشركة الثالثة فهاد الدولة بعد “الاماراتية” و”الاتحاد”، اسهم الشركة الام موزعة بين ” إدارة الطيران المدني في الشارقة حوالي 60٪ من أسهمها في حين تمتلك سلطة مطار الشارقة حوالي 40٪ من رأس المال.
وف3نونبر 2008 تم انشاء شركة تابعة للشركة الام وهي العربية للطيران المغرب” وفيها الخطوط الجهوية اللي كان كتملكها عائلة بنصالح وشي مساهمين اخرين. الهدف كان هو يدخلو السوق المحلية ولكن ما عمرهم كانو يحلمو بالدعم لكبير اللي خداوه من الجهات
كيفاش يتم دعم هادو اي الكيروزين والدولة محيدة الدعم على البترول. واش النقل الجوي شي حاجة حيوية. راه غير كماليات وكاين وسائل اخرى والادهى باش عطاو فلوس يعطيوهم لشركة ديال لمغاربة تتطور وتتقوى ماشي للالة مريم بنصالح ولكمامر ديال الاماراتيين