قضية ماء العينين. النقاش ماشي على الحريات والتعرية فباريس والدرة فالمغرب راه على التصرفيق اللي حل فمو كيف وقع لنادية ياسين واعطاء انطلاق مسيرة ولد زروال من بدية 2019 حتى 2021

نقاش كبير سياسي على قضية ماء العينين. سياسي حقاش النقاش اللي كيهم المجتمع ماشي هاد القضية ديال صور لبرلمانية البي جي دي امنة ماء العينين فباريس بلا حجاب. صور هي كتقول باللي ماشي صحيحة واللي نشروها كيقولو صحيحة. القضية دابا كيف قالت ماء العينين غادية توصل للقضاء وكلفات المحامي امكراز اللي هو رئيس شبيبة الحزب بهاد الملف.
قضية ماء العينين ماشي كاع الديموقراطيين فالبلاد عندهم موقف موحد. فالحقيقة باش يدخل بحال حاجي والهيني كيرجعو اللي كيدافعو على الديموقراطية والحريات بصاح للاور. كلشي عارف علاقتهم ماشي بالبام ولكن بتيار فالبام.
هنا كيفسر علاش واحد بحال عمر بلافريج برلماني الاشتراكي الموحد كان عندو موقف رافض لهاد النقاش. رافض التركيز على لباس ماء العينين. موقف يمشي معاه ناس كثار من المؤمنين بقيم اليسار بقيم الديموقراطية. ما بغاش هو وبحالو يتحولو بوسيلة لتصفية حسابات سياسية مع اصوات حرة مزعجة. امنة ماء العينين ماشي وحدة ساهلة. مواقفها القوية كتخلص عليهم اليوم. عندها اولا جهة فالحزب ضدها بسباب هاد المواقف دابا القاعدة توسعات.
هاد الصور كتشبه للصور اللي تسربات لنادية ياسين مع بداية الحراك. هاديك الصور كانت كافية باش بنت الشيخ ياسين رجعات اللاور وما تنافساتش على حتى منصب. ماشي غير الدولة اللي ربحات من سكاتها بل حتى قيادات فالجماعة استافدات.
دابا جزء من هادوك اللي كيناقشو صور ماء العينين واش هامهم الديموقراطية واش هاماهم الحريات الفردية. طبعا اللا. كاين اللي مسخر وصافي. هادي غير تسخينات لمسيرة ولد زروال الجديدة. تسخينات بدات من 2019 وغادية تستمر عامين. امور كثيرة غادية تبان وغادية تشاف. فيها الاخلاقي وفيها المالي وفيها طبعا الجنس بزاف