فيصل عزيزي: الرجال كيتسطاو على الكريمات وكيذهنو الماسكات كثر من العيالات -تصويرة

الممثل والمغني فيصل عزيزي ديما كيحاول يكسر الطابوهات، ويهدر على مواضيع “حساسة”.
البارح في الليل حط تصويرة جديدة في انستكرام داير ماسك لوجهو وبصدر عريان وكتب عليها “هل تعلم أن الرجال في الصالونات كيتقادو ويتشرطو ويذهنو الماسكات كتر من العيالات، لكن قليل لي عندو ماسك كوري بحالي”.
مول أغنية “هاكة ماما” قال على نفس التصويرة “قليل فالرجال لي يرضى يعترف أنه كيتسطى على الكريمات والحيوانات والحسانات”.
View this post on Instagram
هل تعلم ان الرجال فالصالونات كيتقادو و يتشرطو و يدهنو فالماسكات اكثر من العيالات؟ و لكن قليل اللي عنده ماسك كوري بحالي ???????? و قليل اللي يرضى يعتارف انه كايتسطى على الكريمات و الحسانات و الحيوانات ???? #تناقضات
A post shared by Fayçal Azizi فيصل عزيزي (@faycalazizi) on Sep 2, 2019 at 11:14am PDT
في التعاليق بانو صحاب العقول الصغيرة والمتزمتين لي تفكيرهم مكيفوتش نيفهم وبداو بالسبان ووصفوه بكلام مافيه مايتقرا، وهو تفاعل وجاوب شي وحدين بالبارد وبزاف خلاهم منشورين.
وهادي ماشي أول مرة عزيزي يدير الجدل بالتصاورو ديالو، وهو معروف انه من الناس لي كيدعمو الحريات الفردية وماعندو حتى مشكل مع المثليين ولا غيرهم.
ومباشرة من بعد التصويرة دار “لايف” وقال فيه أنه عندو أحسن فانز في العالم حيت قارين وواعين وكيتقاتلو باش يفرضو راسهم وافكارهم.