اليوبي: السيدة اللي فيها “كورونا” جات من مدينة بولون الإطالية ف 25 فبراير.. وغانجريو التحاليل للمرافقين ديالها

قال محمد اليوبي، مدير مديرية الاوبئة وحاربة الأمراض، باللي السيدة اللي تاكدات الإصابة ديالها بالفيروس اليوم جات نهار 25 فبراير، وجات فالطيارة من مدينة بولون الإيطالية إلى مطار محمد الخامس فكازا.
مبغاش اليوبي يتكلم على عدد الركاب اللي كانو فالطيارة ولا الطيارة لأشمن خطوط تابعة، لكنه أكد بللي غيتم إخضاع كاع الناس اللي كانوا مرافقينها فالرحلة ديالها أو تلاقاو بيها فضلا عن أفراد عائلتها للفحوصات اللازمة، ويمكن يتم إجراء التحاليل المخبرية ليهم باش يعرفو واش نتاقلات ليهم العدوى، وبالتالي واش مصابين بالفيروس ولا لا.
وقال، فالندوة اللي عقداتها وزارة الصحة هذ الصباح فالرباط، لتونوير الرأي العام بشان حالة الإصابة الثانية ب”كورونا”، بللي لجنة صحية مكلفة برصد وتتبع الحالة الصحية للناس اللي كانو مع السيدة فالطيارة، وغيقومو بجرد الأشخاص اللي كتنطبق عليهم مجموعة من المعايير باش يديرو التحليلات.
وكشف بللي الوزارة فعلات مخطط التصدي للفيروس فالمرحلة ديالو اللولة فقط، واللي كتكون فاش كيتم الكشف على بضع إصابات بيه، لكن من المرجح الشروع فالمرحلة ديالو الثانية مع ظهور مستجدات جديدة.