بعد منعو فدار الثقافة.. مولات كتاب “العلاقات الجنسية” فحوار مع “كود”: المرا من حقها تعبر على رغباتها الجنسية والتكتم على الطابوهات كيشكل خطر على المجتمع

حملات الباحثة الشيماء بن علي المكناسي المسؤولية الأولى لإلغاء نشاط كتابها “العلاقات الجنسية وتأثيرها على الاستقرار الأسري” فالأنشطة المدرجة في برنامج دار الثقافة للاحتفال باليوم العالمي للمرأة ف8 مارس، (حملات المسؤولية) لوزارة الثقافة، وتاسفات لكون السلطاك كنعتبر هذ النوع من المواضيع حسلسة وماخصهاش تتناقش.
وبخصوص مضامين الكتاب، قالت المكناسي، فحوارها مع “كود”، بللي ماوصلاتش درجة الإباحية باش يتم منعها، وأكدات بللي الكتاب كيتطرق لمجموعة من المواضيع المهمة اللي خاصها تتناقش أهمها التربية الجنسية ودورها في توعية الاطفال والمراهقين، وحقوق المرأة الجنسية.
وها الحوار كامل اللي جراتو “كود” مع الكاتبة
————
كود: خبر منع كتابك من أنشطة اليوم العالمي للمرأة فتطوان دار ضجة كبيرة، واش ممكن تقربينا أكثر من هذ الكتاب؟
المكناسي: كتاب “العلاقات الجنسية وتأثيرها على الاستقرار الأسري” هو كتاب حديث الإصدار، نشراتو مطبعة الخليج العربي بتطوان ففبراير الماضي (2020)، كيتطرق لمجموعة من المواضيع أهمها الحديث على الجنس والغريزة الجنسية بصفة عامة، النظرية المشرقية والغربية عن الجنس، الجنس من المنظور العلمي، الثقافة الجنسية والتربية الجنسية منذ الصغر وأهميتها، الحب لكونو أساس العلاقات الجنسية والألفة بين الزوجين، وطبعا تكلمت على الجنس من منذور إسلامي فمقدمة الكتاب و لو اني مادرتش هكذا كنت اكيد نتلقى اتهامات خيالية مع كامل الأسف.
كود: كيفاش جاتك الفكرة تتطرقي لهذ الموضوع بالذات؟
المكناسي: لأن القارئ كتستهويه المواضيع اللي كتهمو فحياتو أكثر من المواضيع الفكرية أو الأدبية، هذ الموضوع كيمس القارى سواء كان ذكر أو أنثى، مراهق أو شاب أو راشد، ثم أنا ديما كيستهويني الخوض فالمواضيع اللي عندها علاقة وطيدة بمجتمعنا، وخصوصا الطابوهات اللي ماشي كلشي كيقدر يناقشها، واللي كتتطلبواحد الشجاعة كبيرة وجرأة، كذلك الحاجة اللي دفعاتني أكثر أنني نظير هذ الكتاب هي أنني كنشوف النساء والفتيات عندهم استحياء كبير من التعبير على رغابتهم الجنسية للزوج، وهذ الأخير حتى هو كيعتقد بللي مراتو إلى طلبات منو رغبات معينة فهي ما مزياناش، لكن هذشي من حقها والراجل خصو يوعا بللي الجنس غريزة عند الجنسية بجوج وماشي غير عند الذكر.
كود: واش طبيعة هذ المواضيع هي اللي خلات دار الثقافة فتطوان تمنع لقاء حول الكتاب ففعاليات عيد المرأة؟
المكناسي: نعم وهذشي مؤسف، أنا فبادئ الأمر بعد صدور قرار المنع اعتقدت أن الأمر كيتعلق بمستوى الكتاب العلمي، وقلت هذشي طبيعي بحكم أول تجربة ليا ممكن يكونوا فيها نواقص، لكن منين اتصلت باللجنة من أجل الاستفسار، قالولي باللي بالعكس الكتاب مزيان لكن المشكل فأنه تطرق لمواضيع حساسة، لكن الكتاب ماواصلش لمستوى الإباحية طبعا، هو كتاب عادي كيتطرق لحياتنا الجنسية اللي مازال المجتمعات المتخلفة كتعتبرها حشومة وعيب، وخاصنا عوض ما نتسترو على هذ الأمور نهرسو الجدار ونتكلمو عليها لأن هذشي لصالحنا جميعا، كذلك راه من الحريات الفردية اللي خاصها تتحترم أن الإنسان يكتب فاش ما بغا ويخترق الطابوهات.
كود: شكون كتحمليه مسؤولية منع الكتاب ديالك.
المكناسي: كنحمل المسؤولية لوزارة الثقافة بالدرجة الأولى لانها هي المسؤولة على الانشطة اللي كتدار فدور الثقافة فكَاع ربوع المملكة، كذلك كنحمل شيء من المسؤولية أيضا للجنة اللي رفضات الكتاب، وطبعا كنشوف أن السلطات ديما كتحاول تتجنب هذ المواضيع وهذا شيء سلبي.
كود: فنظرك واش التكتم على الطابوهات، وخصوصا الجنس، ليه سلبيات خطيرة؟
المكناسي: طبعا، وخصوصا عند الصغار اللي ماتلقاش تربية جنسية، يمكن ليهم تكون عندهم افكار خاطئة على الجنس، وبالتالي فاش يكبرو يقوموا بتصرفات كتشكل خطر كبير على المجتمع، ويوقع التحرش والاغتصاب، ويتم توظيف هذ الغريزة في غير محلها ولإيداء الآخر.