ولد خالة مول الحوت الافتراضي زاد تشوه. مصدر رسمي ل"كود": ها اللي كان حاضر للقاء وما كان حتى واحد فالعائلة الا والده و3 اخوته وها الشهود

هاداك السيد اللي قدم راسو على انه ولد خال محسن فكري مول الحوت اللي تطحن مسكين فكاميو الزبل باش كان كيدافع على حوتو الجمعة ما قبل الماضية٬ وقال البارح فوقفة بالشموع فالحسيمة انه ولد خالتو وسمع باللي وزير الداخلية محمد حصاد هدد والد محسن وقال ليه ايلى حدثت فتنة في الوطن فانت المسؤول" طلع كذاب. كذبو اخ الراحل اللي كال باللي ما عندوش كاع ولد خالتو فالحسيمة. مصدر رسمي قال ل"كود" "هاداك بغى يركب على القضية ويشعل الفتنة. اللقاء وراه كاين تسجيل ديالو كان فيه وزير الداخلية محمد حصاد والوزير المنتدب في الداخلية الشرقي الضريس وعامل الحسيمة ورئيس المجلس العلمي بالمدينة ووالد الراحل محسن فكري وثلاثة من ابنائه فقط. وما كان حتى شي حد اخر".
بمعنى ان هاد السيد كذاب واكثر من كذاب باغي يستغل حدث. وكان اخ الراحل نفى امس في تصريح ل"كود" الامر ونفى ان يكون يعرف هذا الشخص.