الكورة فزمن كورونا.. الحواصلي ل"كود": جابونا تجهيزات متطورة وغادي نتدربوا بحال باييرن ميونيخ.. وخاص الواحد ياكل ويقيس

فريق حسنية أكادير جاب تجهيزات متطورة باش يواصل التداريب ديالوا باحترافية عالية طيلة أيام الحجر الصحي، المفروض على جميع الأندية بسبب تفشي فيروس كورونا المستجد.
عبد الرحمان الحواصلي، حارس حسنية أكادير أكد في تصريح ل"كود", أن مسؤولي الحسنية تفاعلوا بشكل إيجابي مع مقترح المعد البدني عبد العالي الرفاعي باش توحد التداريب، مشيرا إلى أن الفريق السوسي شرا واحد لابليكاسيون (تطبيق) ونظام معلوماتي باش اللعابة يدربوا مجموعين وعن بعد تحت إشراف الطاقم التقني، اللي غادي يكون كيتابع التداريب مباشرة.
الحواصلي أكد أن الحسنية شرات للعابة التجهيزات الرياضية بحال الفيلو، اي الدراجات الرياضية ومعدات أخرى كيحتاجوها اللعابة، اللي بدأوا كيتوصلوا بيها، كما أن الحسنية الفريق الوحيد في المغرب اللي شرا هاد المعدات.
عبد الرحمان الحواصلي، الحارس المتألق في الحسنية أكد أن اللاعبين غادي يبقوا يدربوا من نهار الاثنين الجاي بحال اللعابة ديال باييرن ميونيخ الألماني بعد شراء المعدات اللازمة والتطبيق المعلوماتي.
وبخصوص البرنامج الغذائي للاعبين، أكد الحواصلي أن الواحد خاص ياكل ويقيس، باش ما يزيدش في الوزن، لأنه الا زاد فيه غادي يصعاب عليه يرجع في المستوى اللي كان عليه، وزاد قائلا "خاص كل واحد يحافظ على نظام صحي متوازن، وخاصوا يتجنب الصهير وينعس بكري باش يحفاظ على رشاقته ولباقته البدنية، هادشي اللي مطلوب في هاد التوقيت ديال الحجر المنزلي" .