قضية المؤثر اللي اتهماتو أمريكية باغتصابها.. هاشتاكَ "البنات حضيو راسكم" رجع للواجهة

نايضة هذ الأيام فمواقع التواصل الاجتماعي، و"فيسبوك" تحديدا على واحد الطالب فكلية الطب سميتو (أ.ف)، اتهماتو أمريكية باغتصابها فسطوريات وفيديوات على أنستكَرام، ودابا مجموعة من الناس دارو نفس الشي، واستعملو هاشطاكَ #البنات_حضيو_راسكم باش يتهموه بدورهم بجرائم عندها علاقة بالاعتداء الجنسي على البنات.
السيد اللي خلق جدل كبير داير فيها "مؤثر" وكيقول للناس بللي هو "طبيب"، في حين مازال كايقرى الطب فالكلية، معروف باستعمالو للخطاب الشعبوي والديني وداكشي ديال "قال الله" و"قال الرسول" باش يكسب حب الناس وإعجابهم، "ويمكن هذشي اللي خلا الضحايا ديالو يثيقو فيه.. وإلا شفتي شي حد كيخلط الضومين ديالو بالدين والدعوة الى الاسلام وكيدوي غير بالنفحات الربانية وله وجه يشع منه النور راه هادشي كلو لا يجعله أهل للثقة أكثر من غيره داخل الواقع الافتراضي"، على حد تعبير واحد الناشطة ف"فيسبوك".
جرائم مدعي الثقية والفضيلة والمبادئ.. …كثيرات هن ضحاياه اللواتي تعرض للتحرش وللاغتصاب ومحاولة الاستغلال الجنسي …
Publiée par Hanane Rihhab sur Mardi 19 mai 2020
البلان اللي وقع خلا مجموعة من الفاعلين والحقوقيين يدخلو على الخط، وعلى رأسهم البرلمانية فحزب الاتحاد الاشتراكي، حنان رحاب، اللي اعتبراتو "مدعي الفضيلة" وشافت بللي "الجرائم اللي ارتكب ثقيلة"، وزادت "الضحيا ديالو اللي تعرضو للتحرش والاغتصاب ومحاولة الاستغلال الجنسي كثارات، لكن حتى وحدة فيهم ما كانت عندها الشجاعة باش تلجأ للقانون.. واختاروا يعبروا على هذشي بالهاشتاكَ".
وقالت رحاب أن (أ.ف) "معروف وعندو شبكة علاقات، وكيقدم راسو كرجل موعظة ومثقف وإنسان منفتح والمبتسم والذي يقدم النصائح"، لكن فالمقابل: "بارع في استغلال هذه العلاقات التي يوثقها بالصور وينشرها على صفحته بالانستغرام للإيقاع بضحاياه".
هادي عام كنت شفت هاشتاك في إنستغرام سميتو #البنات_حضيو_راسكم داروه بزاف ديال البنات وكيحذرو فيه من واحد المؤثر ما جبدوهش…
Publiée par Marouane Lamharzi Alaoui sur Mercredi 20 mai 2020
من جهتو قال المهندس المعلوماتي المغربي اللي عايش فأمريكا، مروان المهرزي، أن مازال المجتمع المغربي كايخاف من حشوفة، ولذلك السيد مازال مادعاتو حتى وحدة، "وبنادم فيه أمراض نفسية وحكار ديال بصح وكيستمر في الإنحرافات والإعتداءات ديالو حيث حتى واحد ما كيوقفو".
وتأسف المهرزي منين شاف بزاف كايسبو الأمريكية حيت فضحاتو، وقال بللي المجتمع المغربي ماكايوقفش فصف ضحايا الاعتداءات الجنسية، "هذي غير أمريكية.. كنتخيل كون كانت مغربية لي جبداتو نيشان شنو كانو غادي يديرو لها، وشنو غادي يكون التصرف ديال عائلتها"، على حساب هضرتو
ورجح يكونو بعض الناس ماتاقوش بهذ الاتهامات، واخا كيف قال "ملايين البنات" هضرو عليها، بسبب "الهالة الملائكية اللي راسمها (أ.ف) على راسو"، واللي فنظرو ماكاتعنيش أنه فعلا ملاك.