بالتفاصيل. ها كيفاش غادي تتحل الازمة الانسانية د7100 عاملة فحقول الفريز وها شكون هوما المتدخلين

شكر رئيس جمعية مالكي مزارع الفريز في منطقة ويلبا، جميع المتدخلين في حل مشكلة العاملات فحقول الفريز العالقات فاسبانيا، وذلك مباشرة بعدما تم الاعلان صباح اليوم عن بدء إجراءات ترحيل العالقين، ومنها اجراء التحاليل.
خوسي لويس غارسيا، شكر حكومة ويلبا، وعدد من المؤسسات والمنظمات لي قدمات المساعدة، بالاضافة لسفيرة المغرب فمدريد، لي قال انها كانت في محادثات دائمة فالفترة الاخيرة معاهم لحل الازمة.
هاد الازمة بالاضافة لحكومة ويلبا لي تكلفات بالتيست لي غايدار لهاد العاملات، فتدخلات فيها جمعية مالكي مزارع الحمضيات، رغم أنهم ماعندهم حتى دخل فهادشي، ولكن تدخلوا باش يقدمو يد المساعدة وينقلو وينظمو عملية اجراء التحاليل.
وطبعا جمعية مزارعي الفريز تا هي واقفة مع العاملين المغاربة لي كانو خدامين عندها، زيادة على عدة منظمات أخرى وناشطين اجتماعيين كانوا واقفين مع هاد المغاربة منذ بداية الازمة.
العملية حسب بلاغ لمنظمات فلاحية مشاركة في العملية، توصلت به "كود"، غادي تستغرق عدة ايام لترحيل جميع النساء العاملات، واستنكر البلاغ محاولات عدد من النصابين، النصب على هاد النسا وايهامهم بأن هناك سفن غاتمشي للمغرب باش يقطعو فيها البيي، وهادي كانت مجرد عملية نصب لسرقة اموالهن.
وقال البلاغ أن أربع منظمات فلاحية، راها دابا كاتوجد الاوراق لجميع هاد النسا باش يترحلو ويرجعو لاسرهم وتنتهي المعاناة ديالهم.
ومن غير هادشي حكومة ويلبا غادي تتكلف هي بمصاريف جوج د لي تيست لجميع هاد النسا العالقات في اقليم ويلبا.