كيفاش تلامذ دايرين ليهم فرض في الصلاة بحال الى هوما كفار قريش إبان فتح مكة.. مؤسسة ديال القراية عوض يعلمو الأطفال كيفاش يعيشو الحياة ويوصلوهم لديبلوم باش يواجهوها كالسين يعلموهم ثقافة مابعد الموت

حتى السعودية لي هي أصل وباء الوهابية وفيروس التشدد سالات مع هادشي، وحاليا كتقضي على الآثار ديال التشدد وغادية كتتغير وتتطور بسرعة كبيرة وكتنفاتح وكتسوس عليها الغبرة والغيس ديال الأفكار الدينية المحافظة، وأفغانستان براسها الناس طلع ليهم فراسهم آشنو كيتسبب فيه التشدد من مجازر وكوارث وتخلف ورجوع بالزمن لعصر الظلمات، وحاليا راه حتى هوما كيتغيرو ويتبدلو ولو ببطئ حيت التشدد فيروس خطر من كورونا، العالم كيتبدل وغادي وكيسوس عليه بحال هاد الأفكار ديال حلال وحرام وإتباع قوانين قديمة معندها علاقة بالوقت الحالي، عاد بداو ناس سوس في المغرب يتصنتو لواحد جوج دواعش النهار كامل وهوما منشزرين في المواقع الإجتماعية كيحرمو كاع الحياة العامة، وكالسين كينشرو التخلف والتشدد والعقيدة الوهابية في جبال سوس وحاحا، هاد العقيدة لي السعودية مولاتها وراها كتخلى عليها وحنا عاجد بانت لهاد الجوج ينشروها في سوس العالمة.
قبل مايبدى التفركيع في المغرب كانو السلفيين مطلوقين داك الساعة واخدين راحتهم والكاسيط كيتباع والكتوبة كيتفرقو، والسويقات كيتسيطر عليهم والتجارة محركة، حتى دخلو فالمسكي داك الساعة جمع المخزن معاهم راسو، ودابا راه بحالهم مطلوقين في حاحا العظمى، عاطينها لداك الخطاب ديال حرام حرام بالأمازيغية ومقادين فيديوات بالمؤثرات ديال صليل الصوارم، وكالسين كيختارقو الجبال والمناطق النائية بالكلاخ ديالهم لي قاصح وقادرين يحفرو بيه الحجر، وطبعا عندو أساس لي يخلي الواحد يمكن يقبلو، مادام أن القصف متعدد الجبهات، ها الواتساب ها النيميريك ودابا شيوخ اليوتوب، وآجي نعاودو الألفينات من اللول عاوتاني.
فالتسعينات كان أي حانوت ديال سواسة تدوز من حداه أو تدخل تتسخر منو غادي تسمع موسيقى الروايس مطلوقة، بدون إستثناء كان بحال إعلان هوية المسجلة والكاسيط ديال الروايس والسوسي كيدنن معاهم من ورا الكونطوار، دابا أغلب الحوانت لي فيهم تلفازة كتلقاه طالق قنوات اللحايا أو القرآن بحال الى راه شاد حق الله أو في كنازة، هاد ثقافة الموت مكانتش نهائيا عند سواسة، وللأسف دابا تدعشيش راه ختارق الجبال والسوسي وللى يهبط للمدينة لابس القميص ومربي اللحيوية ومكثر من حرام وحلال، والمعلمين الخوانجية ساهمو بزاف في تدعشش سوس العالمة الناشطة، وهاحنا شفنا كيفاش تلامذ دايرين ليهم فرض في الصلاة بحال الى هوما كفار قريش إبان فتح مكة، مؤسسة ديال القراية عوض يعلمو الأطفال كيفاش يعيشو الحياة الدنوية ديالهم ويعطيوهم سلاح الديبلوم باش يواجهوها، كالسين يعلموهم ثقافة مابعد الموت.