وزارة بوريطة اللي كتحتاقر لمرا كدير الفرزيات. ايلى كنتي استقلالية وشريفة علوية طلعي الفوق ولا كنتي كتخدمي بحال بنيعيش نزلي للتحت

ناصر بوريطة وزير الخارجية والتعاون وفي لاحتقارو للمرا. مشكلتو ابدية مع لمرا. حتى فاليوم العالمي للنساء 8 مارس كيبين هاد الموقف. اليوم ناسو اللي كيعبدوه فالخارجية نشرو لائحة من سفيرات باش يبين باللي للمرأة وضعية خاصة فالخارجية. طبعا هاد الشي ماشي صحيح وهو ما عندوش مع النساء اللي فيدهم. محتاج ديما اللي كيطبل ليه.
فهاد اللائحة اللي فيها 19 سفيرة وحدة اسمها اسية بنصالح العلوي غير زايدة. عندها منصب ما عندو معنى هو سفيرة متجولة.
لكن فطريقة تقديم هاد اللائحة كتبان عقلية بوريطة. الفوق على ليسر كاينة كنزة لغالي. طبعا الاستقلالية اللي دايرة الدرة عندها اللي كيدافع عليها فالخارجية. حقاش بوريطة ولى كيخدم الناس اللي خدمو مع الاستقلاليين. هادي مناسبة ردو الخير وصافي.
فليمن كاينة هاديك اللي ما صالحة لوالو بنصالح اسية العلوي وكاينة جمالة العلوي اللي سفيرة ضعيفة للمغرب فواشنطن. الحاجة الوحيدة اللي دارتها انها بنت اميرة للي هي عمة الملك محمد السادس. ايلى لاحظو ان بوريطة وناسو دايرين نساء من القصر الفوق.
فالتحت كاع بين مشاكلو مع النساء اللي كيدافعو على حرية المرأة او اللي كيخدمو. كاينة خديجة الرويسي سفيرة المغرب فالدنمارك فاقصى يسار الصورة وكاينة كريمة بنيعيش سفيرة المغرب فاسبانيا فاقصى اليمين. عقلية هاد السفيرات بجوج ضدها ناصر بوريطة. حقاش عندهم شخصية قوية وعندهم احترام كبير فالدولة اللي خدامين فيها.
بوريطة غادي يحتافظ ليه التاريخ باللي كان وزير كيكره السفيرات اللي عندهم شخصية والمديرات اللي عندهم شخصية. عزيز عليه اللي كيعبدو اللي كيصورو سوبر مان.