محاكمة الريسوني تأجلات لفاتح يوليوز.. والدفاع: هذي محاكمة غيابية للصحافي ووضعيتو الصحية كتزيد تتكفس

أجلات غرفة الجنايات الابتدائية بمحكمة الاستئناف بكازا، محاكمة الصحافي المعتقل سليمان الريسوني، المضرب عن الطعام ل83 يوم، حتى لفاتح من يوليوز المقبل، أي بعد غدا الخميس.
وللمرة الثالثة على التوالي، ماحضرش الريسوني لجلسة المحاكمة ديالو، وهذ المرة كان باغي يحضر، لكن بالنسبة للدفاع فالمحكمة بهذشي مابغاتوش يعاود يبان حيت الوضعية الصحية ديالو كتزيد تتدهور نهار على نهار.
وهكذا تساءل الدفاع، خلال الجلسة، على سبب "محاكمة الريسوني غيابيا"، فالوقت اللي خاصو يحضر باش يدافع على راسو، كيف اكدو ان هذشي ماكيمت شروط المحاكمة العادلة بحتى صلة.
محاكمة الريسوني دخلات محطة جديدة من مناقشة كنه الملف، والريسوني ماحاضرش، وحتى المشتكي به ماجاش.
وتزامنات محاكمة الريسوني اليوم مع ديال الصحفي عمر الراضي، اللي مازال ماسالات للآن، واللي عرفات رفض المحكمة لجميع الدفوعات الشكلية النقدمة من طرف دفاع الصحفي.
ويتابع الريسوني بتهم الاحتجاز وهتك العرض فحق شاب، بينما متابع الراضي بتهم الاغتصاب، وتلقي أموال من جهات أجنبية بغاية المس بسلامة الدولة الداخلية.