الحالة بدات كتتكفس..لليوم الرابع كنسجلو كثر من 1000 إصابة بفيروس كورونا ف24 ساعة

لليوم الرابع على التوالي كنفوتو 1000 إصابة بكورونا، وهذا كيعني أن الوضعية الوبائية فبلادنا كتزيد نهار على نهار تخياب، فالوقت اللي بنادم مابقاش ملتزم بزاف بالكمامة وإجراءات التباعد.
اليوم الجمعة 9 يوليوز، وغير فهذ 24 ساعة الأخيرة تقاسو 1250 بالفيروس، وماتو 5، وفالمجموع 7360 كيتعالجو، وكثر من 32 ألف خداو الجرعة الأولى.
التلقيح:
وتلقحو اليوم 32054 بالجرعة الأولى، ووصلو فالمجموع ل10349861، وتلقحو بالجرعة الثانية 6757، ووصلو فالمجموع ل9220292.
الإصابات:
تقاسو اليوم 1250 واحد من أصل 21216 واحد دار التحليلة، ووصل عدد المصابين فالمجموع ل539839.
ومؤشر الإصابة التراكمي وصل ل1483,4 لكل 100 ألف نسمة، بمعدل 3,4 لكل 100 ألف نسمة فهذ 24 ساعة.
حالات الشفاء:
تشافاو اليوم 751، ووصل الإجمالي ل539839، بنسبة تعافي ديال 96,9 فالمية.
الوفيات:
واليوم ماتو 5، جوج فكل من كازا وتطوان وواحد فالخميسات، ووصل هكذا عدد الوفيات ل9351، بنسبة فتك 1,7 فالمية.
الحالات النشيطة والحرجة:
عدد الحالات النشيطة طلع ل7360، وعدد الحالات الحرجة وصل ل279، 39 تدهورات غير اليوم، و13 تحت التنفس الصناعي الاختراقي.