سجلنا روكور خطير فالإصابات والموت بكورونا فهذ ال14 ليوم، بحيث فالفترة الممتدة ما بين 19 يوليوز حتى ل1 غشت 2021، وتحديدا فهذ السيمانة اللخرة، طلعو الإصابات ب133,1 فالمية، والموت ب75,5 فالمية، بالمقارنة مع حصيلة السيمانة اللي فاتت. أما بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا زيادة ب133,1 فالمية هذ السيمانة بالمقارنة مع السيمانة لي فاتت، بحيث سجلنا هذ الأسبوع 50445 إصابة، مقابل 21648 السيمانة اللي فاتت. وبالنسبة لمنحى الوفيات الأسبوعي، فسجلنا ارتفاع فيه كذلك، بالمقارنة مع الأسبوع اللي فات، بنسبة 75,5 فالمية، حيت سجلنا 244 وفاة هذ المرة، بينما الأسبوع اللي فات كانو ماتو 139. وبخصوص عدد الوفيات حسب الجهات، كتجي جهة كازا سطات فالمقدمة ب62 وفاة، بعدها ومراكش آسفي ب38، وسوس ماسة ب34، وطنجة تطوانالحسيمة ب29، والرباط سلا ب24، وبني ملالخنيفرة 16، وفاس مكناس 12، ودرعة تافيلالت 10، والجهة الشرقية 7، والعيون الساقية الحمرا 6، وكَلميم وادنون 4، والداخلة واد الذهب 2. أما بخصوص نسبة تطور الوفيات، فكازا تطورو فيها الوفيات ب36 مرة، وسوس ماسة ب19، ومراكش آسفي ب15، بينما أكثر بلاصة تطورو فيها الإصابات فهي كلميم وادنون ب410 فالمية، بعدها فدرعة تافيلالت ب249 فالمية، ثم بني ملالخنيفرة ب233 فالمية. أما نسبة إيجابية التحاليل، فجهة كازا سطات فهذ السيمانة كتجي فالرتبة الأولى ب38,5 فالمية ديال الإيجابية، كتجي بعدها جهة درعة تافيلالت ب35,83 فالمية، ثم جهة سوس ماسة ب35 فالمية. وتسجل ارتفاع فعدد المرضى اللي كاينين فأقسام الإنعاش، بحيث فالسيمانة اللخرة، طلعنا من 569 حالة ل860 حالة، بينما تحدد عدد الناس اللي كيديرو التنفس الاصطناعي الاختراقي ل27 مصاب. اما بخصوص مؤشر توالد الحالات، فطلع ل1,47 فحدود 1 غشت الجاري، فيحين كان فحدود 1,25 فحدود 25 يوليوز اللي فات. وبالنسبة لترتيب المغرب، أكدات وزارة الصحة فنشرتها أن المغرب نزل بمركز واحد على مستوى الوفيات والكشوفات عالميا، وولا كيحتل على التوالي المركز 47 عالما، بينما ماتغيرش مركز المغرب فعدد الحالات (42 عالميا) والمشوفات (51 عالميا). أما على المستوى الإفريقي، بقى المغرب فالمركز 2 فالإصابات والكشفات، والمركز 4 فالوفيات. 8
