فالفترة الممتدة ما بين 2 حتى ل16 غشت 2021، وواخا الحالة الوبائية متدهورة بزاف، تبين أن عدد الإصابات هذ السيمانة اللخرة نقصو بالمقارنة مع السيمانة اللي فاتت، وهبط مؤشر توالد الحالات ل0,96، لكن فالمقابل كاين ارتفاع فمعدل الوفيات بنسبة 36 فالمية، وكاين ارتفاع حتى فنسبة اللي دخلو الإنعاش. أما بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا زيادة ب20 فالمية هذ ال15 ليوم بالمقارنة مع ل15 ليوم لي فاتت، بحيث سجلنا هذ الأسبوع 63174 إصابة، مقابل 50445 قبل 15 ليوم. لكن فالمقابل، عدد الإصابات بكورونا انخفض هذ السيمانة بالمقارنة مع السيمانة اللي فاتت، بحيث سجلنا بين 2 و8 غشت 66565، والعدد نقص فالسيمانة الأخيرة، حيث سجلنا 63174. وبالنسبة لمنحى الوفيات الأسبوعي، فسجلنا ارتفاع فيه بالمقارنة مع الأسبوع اللي فات، بنسبة 36 فالمية، حيت سجلنا 682 وفاة هذ المرة، بينما الأسبوع اللي فات كانو ماتو 502. وبخصوص عدد الوفيات حسب الجهات، كتجي جهة كازا سطات فالمقدمة ب160 وفاة، بعدها سوس ماسة ب82، ومراكش آسفي ب80، والرباط سلا ب72، وبني ملال خنيفرة 74، وطنجة تطوانالحسيمة 51، ودرعة تافيلالت 49، والجهة الشرقية 47، وفاس مكناس 38، والعيون الساقية الحمرا 17، وكَلميم وادنون 11، والداخلة واد الذهب 1. أما بخصوص نسبة تطور الوفيات، فبني ملال خنيفرة تطورو فيها الوفيات ب+36، تابعاها جهة الشرق ب+34، والرباط سلا ب+29، ثم الدارالبيضاءسطات ب+21. أما نسبة إيجابية التحاليل، فكلميم واد نون كتجي فالمقدمة ب40,10 فالمية ديال الإيجابية، تابعاها جهة درعة تافيلالت ب36,60 فالمية ديال الإيجابية، ثم جهة الشرق ب29,10 فالمية. وتسجل ارتفاع فعدد المرضى اللي كاينين فأقسام الإنعاش، بحيث فالسيمانة اللخرى، طلعنا من 1397 حالة ل1946 حالة، بينما تحدد عدد الناس اللي كيديرو التنفس الاصطناعي الاختراقي ل64 مصاب. أما بخصوص مؤشر توالد الحالات، فنزل ل0,96 فحدود 15 غشت الجاري، فيحين كان فحدود 1,25 فحدود 25 يوليوز اللي فات. وبالنسبة لترتيب المغرب عالميا، أكدات وزارة الصحة فنشرتها أن المغرب طلع بمركز واحد على مستوى الإصابات، و2 مراكز على مستوى الوفيات ومركز واحد على مستوى الكشوفات، وهكذا صبح فالمركز 38 فالإصابات، 45 فالوفيات و50 فالكشوفات. أما على المستوى الإفريقي، بقى المغرب فالمركز 2 فالإصابات والكشفات، والمركز 4 فالوفيات.
