بنعبد الله عطى الانطلاقة للحملة الانتخابية فكازا.. وصرح ل"كود": بغينا نحاربو عزوف الناس على التصويت وخاصهم يختارو الأفضل واخا مايكونش الأكمل

اليوم الاثنين عطى الأمين العام لحزب التقدم والاشتراكية، نبيل بنعبد الله، الانطلاقة للحملة الانتخابية ديال الحزب ديالو فكازا، وتحديدا فعمالة الدار البيضاء أنفا، ومولاي رشيد، وعين السبع الحي المحمدي.
وفتصريحو ل"كود" فمقر الحزب فأنفا، فزيارتو ليه اليوم من أجل إطلاق الحملة الانتخابية فالمنطقة، قال بنعبد الله أن حزب التقدم والاشترلكية مسلح ببرامجو ومواقفو وتصوراتو، وبمرشحات وطاقات نسائية وطاقات شابة باغة تدخل باش تعطي صورة مختلفةعلى الانتخابات والمجالس المنتخبة والتدبير العام"، حسب تعبيرو.
وقال ان الأهم فهذشي هو يقنع المواطنين بالتصويت، حيت "عارفين كاين عزوف كبير، نقول خاصة فكازا، وكنقول الى بغيتو تمارسو الرفض، الوسيلة الانجع هي معاقبة هذ الناس اللي داخلين للدفاع عن المصالح شخصية، واللي ماكانوش فالموعد، وعكس ذلك تختارو الافضل، ماشي الاكمل ولكن الافضل، اللي قادرين يعطيو صورة مغايرة على تدبير الشان العام والطبقة السياسية"، كيف قال.
وبالنسبة ليه، فالبديل اللي ممكن يعتمد عليه المواطن هو الحزب ديالو.
ومابقاش بنعبد الله بزاف فمقر انفا، بحيث سلم على المرشحين دغيا وشاف الاجواء ومشا تاني باش يشوف مقر مولاي رشيد.
من جهتها، قالت عائشة لبلق، وكيلة اللائحة التشريعية بالدائرة الانتخابية الدار البيضاء أنفا، ان برنامج الحزب تدار بمقاربة تشاركية، بالانفتاح على الأطر والفعاليات والطاقات، كيف تم تنظيم مجموعة من الندوات اللي كتهم القضايا الجوهرية المجتمعية.
وقالت أن البرنامج كيتمحور على السياسات العمومية والانسان وسط هذه السياسات العمومية، كنساء وشباب ورجال ومواطنين فالعالم الحضري والقروي...