فالفترة الممتدة ما بين 17 حتى ل30 غشت 2021، تبين انخفاض ملحوظ فالإصابات والوفيات بكورونا المستجد، بينما مازال كاين ارتفاع فعدد الناس اللي فأقسام العناية المركزة، ومؤشر تولد الحالات حتى هو طلع. أما بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا انخفاض ب17,6 فالمية هذ السيمانة بالمقارنة مع السيمانة اللي فاتت، بحيث سجلنا هذ الأسبوع 42424 إصابة، مقابل 51493 قبل سيمانة. وبالنسبة لمنحى الوفيات الأسبوعي، فسجلنا انخفاض فيه بالمقارنة مع الأسبوع اللي فات، بنسبة 16,8 فالمية، حيت سجلنا 645 وفاة هذ المرة، بينما الأسبوع اللي فات كانو ماتو 775. وبخصوص عدد الوفيات حسب الجهات، كتجي جهة كازا سطات فالمقدمة ب111 وفاة، بعدها الرباطسلاالقنيطرة ب91، ثم طنجةتطوانالحسيمة ب83. أما بخصوص نسبة تطور الوفيات، فالرباطسلاالقنيطرة تطورو فيها الوفيات ب+22، تابعاها جهة الشرق ب+1، بينما بقية الجهات عندهم تطور سلبي. أما نسبة إيجابية التحاليل فهذ الاسبوع الاخير، فجهة الشرق كتجي فالمقدمة ب31,30 فالمية ديال الإيجابية، تابعاها جهة كلميم وادنون ب28,70 فالمية ديال الإيجابية، ثم جهة طنجو تطوانالحسيمة ب23,00 فالمية. وتسجل ارتفاع فعدد المرضى اللي كاينين فأقسام الإنعاش، بحيث فالسيمانة اللخرى، سجلنا 2537 حالة، بينما كنا سجلنا 2389 حالة فالسيمانة اللي فاتت، ووصل عدد اللي دايرين التنفس الاصطناعي الاختراقي 66. أما بخصوص مؤشر توالد الحالات، فطلع ل0,95 فحدود 29 غشت الجاري، فيحين كان فحدود 0,89 فحدود 22 غشت. وبالنسبة لترتيب المغرب عالميا، كشفات وزارة الصحة فنشرتها أن المغرب طلع بجوج مراكز على مستوى الإصابات، ومركز واحد على مستوى الوفيات ومركز واحد كذلك على مستوى الكشوفات، وهكذا صبح فالمركز 36 فالإصابات، 44 فالوفيات و49 فالكشوفات. أما على المستوى الإفريقي، بقى المغرب فالمركز 2 فالإصابات والكشفات، والمركز 4 فالوفيات.
