واش المسؤولين بفاس بغاو ستيفن سبيلبرغ يبقى هاز الضوصي ديالو فيديه وكيدور من إدارة لإدارة باش يجيب رخصة التصوير ويريح حتى هو في القهوة لي قبالت الولاية عالله يتلاقى بشي سمسار يقضي ليه الشغل بالزربة باش يصور انديانا جونز

تخايل معايا وحدة من أعظم السلاسل السينمائية إنديانا جونز جات تصور في مدينة فاس، الخبر لي مفرح وسار ويعطي أمل لهاد المدينة الميتة، ولكن في اللخر تقرى خبر أن المنتجين كاعيين وماعاجبهمش الحال بسباب التعقيدات الإدارية، استديوهات والت ديزني كاعية من الممطالة الإدارية في هاد المدينة ومستغربة من كيفاش أن التصوير غادي يدخل للمدينة والمواطنين شلا فلوس وغادي يروج الحركة ومع ذلك المسؤولين خدامين معاهم بتقنية سير حتى تجي، الشركة حجزات أغلب فنادق مدينة فاس وغادي توفر سبعلاف منصب شغل لمدة ربع شهور، مابين ممثلين وكومبارس وتقنيين وشيفورات، عاد زيد عليها التكوين والخبرة لي غادي ياخدوها الشباب الفاسي من العمل في إنتاج ضخم من هاد الحجم، راه غادي يخدمو مع سبيلبرغ وماشي هادي أول مرة يصور في المغرب، ومع ذلك والا من مجيب وماتسوق ليه تاواحد، وحسب هيسبريس فراه تاصلو بعبد الواحد الفاسي وبالمركز السنمائي وقالو ليهم مافخبارنا والو، والت ديزني أكبر شركة ديال الإنتاج والإعلام والترفيه في العالم جايا تصور في المغرب والمسؤولين المغاربة معندهم خبار.
واش المسؤولين بفاس بغاو ستيفن سبيلبرغ يبقى هاز الضوصي ديالو فيديه وكيدور من إدارة لإدارة باش يجيب رخصة التصوير ويريح حتى هو في القهوة لي قبالت الولاية عالله يتلاقى بشي سمسار يقضي ليه الشغل بالزربة باش يصور انديانا جونز، راه كاين فعاليات ومشاريع لي الدول كتعرض على الشركات يديروهم عندها وكتخسر الدولة من جيبها غير باش يقبلو لأن داكشي كيكون فيه إشهارإشعاع للدولة أو المدينة، مثلا طواف فرنسا راه كاين مدن صغيرة لي كيخلصو الفلوس للطواف باش يدوز من عندهم حيت كيجيب الرواج وكيشهر المدينة، والفنادق كيعمرو كاملين، والدول كتنافس باش يتصورو فيها الأفلام الكبير ويجيوها المنتجين العظماء، فاس مدينة عندها التاريخ والعراقة ولكن للأسف معندهاش مسؤولين لي يسيروها ويستثمرو فهاد التاريخ وفي هاد العراقة وفهاد المدينة القديمة التاريخية والإستثنائية، عندك واحد الحاجة مكايناش في بلايص خريين ومع ذلك ماعارفش تبيعها وتسوق ليها واش كاين شي كلاخ وفساد كثر من هذا.
بزاف ديال المدن في المغرب لي طورو من التوجه السياحي ديالهم بأفكار زوينة من الشباب وبمساعدة من المسؤولين لي هيئو الظروف، مدينة بحال صويرة مثلا واخا صغيرة بزاف بزاف مقارنة بفاس ولكن لمدينة القديمة ديالها سياحية بإمتياز نقية وعامرة كوانات ومتجددة، مطاعم جديدة وعصرية وزوينة تفتح ليك الشهية تريح فيها، تيراسات نقية وبثمن مناسب للأجانب والمغاربة، فاس لي قدم وكبر كتخل مع باب بوجلود كتبقى غادي كل شوية تلقى مول الديطاي مجمعة حداه رباعة ديال خطوطو والوشام مكتعرف واش المنطقة سياحية ولا راه تلفتي ودخلتي فشي دريبة ماهياش، مناظر لي متشوفهاش في مراكش أو الرباط مثلا، بالاظافة الى حوانت كثار معلقين للبيع أو الكراء وبزاف منهم باقين كيبيعو تقريبا نفس المنتجات لي كانو كيبيعوا القرن لي فات بلا تطور بلا تطوير، حقا هاد القدومية راه هي لي كيبغي السائح يشوفها يشوف التاريخ يشمو ويحس بيه، ولكن تكون هاد القدومية معتنى بها ومصاوبة عن سابق تخطيط ماشي نتيجة الإهمال، ومن هاد الحادثة ديال تصوير فيلن انديانا جونز غادي يبانليك أن المسؤولين وحتى المواطنين هنا كاع ممسوقين للمدينة بحال الى عاجباهم تبقى مردومة هاكا.