واش المحاماة ولات بالتوريث فعهد وهبي؟.. بزاف للي نجحو فالكونكور من ولاد المحامين والسياسيين والأعيان ومنهم لي مهندسين وأساتذة بغاو يبدلو المهنة

أثارت نتائج مباراة المحاماة اللي خرجت لبارح الكثير من الجدل فمواقع التواصل الاجتماعي، وصلت لدرجة التشكيك فالنتائج، خصوصا وأن عدد مهم من أبناء وبنات المحامين وعائلات السياسيين والأعيان خرجو فلاليست ديال الناجحين فالمباراة.
الشكوك كاينا، والوزارة ضربات الطم، خصوصا وأن صفحات فايسبوكية بحال "الفرشة" كشفات بلي كاينا خشونة فهاد النتائج وغايسربو بالأدلة هاد التلاعبات.
فعاصمة سوس، كولشي كيهضر على أسماء الناجحين من أبناء مدينة أكادير، بحيث الاسم العائلي وهبي هو لي تصدر اللائحة ديال الناجحين، وأبناء وبنات الأعيان، ومنهم لي تخلا على مهنة الهندسة ومشاو للمحاماة.
نبداو بالسميات لي عليها تساؤلات، أولها بنت عبد الواحد الأنصاري، رئيس جمعية هيئات المحامين بالمغرب، مروى الأنصاري ولي هي برلمانية في نفس الوقت، دازت فالامتحان، ثانيا الاسم العائلي وهبي تكرر بزاف، ورئيسة المجلس الإقليمي تمارة اعتماد الزاهيدي، والبرلمانية السابقة أمنة ماء العينين، وزكرياء مضيان الاستقلالي من عائلة نور الدين مضيان، رئيس الفريق الاستقلالي بمجلس النواب.
ومن الأسماء كذلك لي أثارت الجدل، أبناء وبنات المحامين، لدرجة كولشي كيتساءل واش مهنة المحاماة رجعات مهنة ديال التوريث والعائلات وديال الريع بحال البرلمان.
فهادو لي دوزو الكونكور عندهم خدمة ديالهم ومرفحين، وجاو مزاحمين مع الخريجين لي هوما عاطلين وبغاو يبداو تجربة فحياتهم المهنية. بزاف عندهم عمل مريح وقار.