جريمة منظمة.. ها تفاصيل جديدة على قضية البوليسي المحروگ

لبارح منين لقاو البوليس الطوموبيل "golf5" ديال البوليسي الضحية وشاعلة فيها العافية فسوق الاحد فبوسكورة، بدات كتبان علامات اخرى لي كتبين ان الموضوع عندو علاقة بجريمة منظمة وميمكنش بتاتا تكون جريمة عادية.
وفتفاصيل جديدة على القضية كشفات مصادر "گود" أن الضحية تذبح أولا بموس، وطار ليه الدم عاى النظاظر وعاد من بعد داوه وحرقوه فالسوالم، وهاد الشي ميمكنش يكون الفاعلين ناس عاديين هادو كيعرفو اش يديرو وماشي بعيد يكون للأمر علاقة بعملية إرهابية.
وعلى حسب مصدرنا دائما فراه الجناة كاينين اكثر من أربعة وفق آخر التحريات، وخدامين العناصر الأمنية بالليل والنهار باش يطيحوهم فاقرب وقت.
هذي الجريمة النكراء لي هزات الراي العام الوطني خدما فيها نخب ديال المحققين من الفرقة الوطنية لأبحاث القضائية التابعة لجهاز الدرك ونخبة من الفرقة الوطنية لشرطة القضائية والمخابرات الداخلية بالاضافة الى اجهزة أخر تابعة للمديرية العامة الامن الوطني لي خدامين باش افكو طلاسيم هذه الجريمة لراح ضحيتها بوليسي تعمل بمنطقة الرحمة .