"كود" عينات الأجواء فدار السلام بتانزانيا قبل ماتش الوداد وسيمبا... وها التفاصيل

الأجواء في دار السلام اللي غادي تحتاضن الماتش ما بين الوداد الرياضي وسيمبا التانزاني، كلها ترقب، مع وصول أي مغربي لمطار جوليوس نيريري، كيتجمعو عليه الموظفين ورجال الأمن باش يسولوه على الفريق الأحمر وكيفاش كيشوف الماتش.
Ad
00:00
/
00:36
Ad ends in 36s
كود كانت حاضرة، من أول أمس، وعاينات الأجواء كيفاش دايرة قبل الماتش من المطار الى غاية وسط المدينة.
جمهور سيمبا عارف الماتش قاصح على الطرفين ولكن كيعتاقدو أن ارتفاع درجات الحرارة لي طالعة هاد الأيام غادي يخدم فريقهم.
فحديث مع "كود" مشجعين ديال فريق سيمبا قالو باللي القرعة لم تكن عادلة بالنسبة لفريقهم وأنهم ملي شافو أن خصمهم في الربع هو الوداد قالو صافي مشينا فيها!
الأجواء اللي غادي يتلعب فيها الماتش غادي تكون حارة وممطرة، هاد الفترة من السنة عندهم، كتعرف دخول الصيف أو الفترة الجافة فهاد المنطقة الاستوائية في الوقت اللي كتبقى فيه الشتا مجهدة نسبيا.
هاد الجو اللي فيه الشتا والصهد كيعولو عليه المسؤولين ديال الفريق التانزاني باش يعاونهم خصوصا وأن الماتش ملعوب مع الوحدة ديال النهار في الفترة اللي مصهدة بزاف.
جمهور الحمرة بدا بالتوافد على دار السلام من نهار الأحد، واخا الماتش جاي في الفترة ديال رمضان وعيد الفطر الوينرز غادي تكون حاضرة، لتشجيع الحمرا، بحيث وصلو أعضاء الإلترا من فروع أوروبا وأمريكا الشمالية والخليج ومازال غادي يصلو أعضاء آخرين من المغرب، وباقي الفروع ديال الوينرز اللي معولين يساندو اللاعبين معنويا بالحضور ديالهم باش العائلة ترجع بنتيجة إيجابية من دار السلام وترسخ شعار غزاة القارة.