حاجيتكوم خير وسلام على خصومة شفتها فالمنام

http://www.elmayssa.com

حاجيتكوم خير وسلام
على منظر وحديث غريب
شفتو البارح فالمنام
ومابغا من بالي يغيب

شفت مصباح داير عمامة
ولابس بلغة وسلهام
وخنجر وعود وحمامة
عندهوم الشعر والفِّامْ
وتراكتور لابس صْبّاطْ
ودايرْ فعنقو كْراڤاط
ومجموع بيهوم فالرباط
فقبة عليها حكّام

***

وقف المصباح وقال
للتراكتور عندي سؤال
كيفاش كنتي بالأَمْس
فِكْرَة من خيال
وطْرتِي كِيبْحال النّمْسْ
فدقيقة صبحتي الْقدّام

كان الفلاّح قاضي بالفاس
يحرث أَرضو بيديه
والزرع يطلع بالقياس
للّي باعُو يكفّيه
واليوم تراكتور الهمّ
شغلك غير صداعْ الفمّ
نصرفُوا عليك باشْ تخدْم
چاعْ للّي نحصْدوه فعَامْ

تزيد خْطوة وتوقف
حْدِيدك غير مْلْقّف
للّي دْوَا معاك يرعف
الحكَام وقْلّة ليدام

نهار كَيْخطَاك مولاك
ويخْوي بيك مْنْ وَالاك
وتّقْشّر ويبان صْداك
تْخبّي راسك كيف النعام

ماعرفناك آش باغي
واش تحرث ولاّ تبان
حديثك كُلّو مْلاغي
واش غْنَا ولاّ سْبّان
تقليدي ولاّ عصري
عيبك بان من بكري
للّي باعك ما يشري
غير الرّاحة والسلام

للّي جا دغيا يمشي دغيا
قالوها سيادنا القدام

***

ناض التراكتور من بلاصتو
قادّ الفيسْتَة والكْراڤاط
وشاف فالمصباح وحَالتو
وقبطو كي بوغطّاط

قالّو يا مصباح يا شِين
الناس بْدّلوك بالثّرِيَّة
حتّى علاء الدين
دَار لاَمبا عصرية
وخْلاّ المصباح السّحري
للأمة العثمانية
وجَا للّمغرب كيجْري
بَاغي العلمانية
أمّا الجّن للي فيك
مابقاش يقول لبّيك
خرج على طوع يدّيك
وجاتو أزمة قلبية

يا كْهيب من مصباح
مَا بْقيتي لاَش تصْلاح
فالمْدُون راك التّلاح
سْهْمك العروبيّة

خْلّي عليك النفاق
والفوحان والتزواق
كولْشي عارفك تْكدب
النّور بْلاصتو فالقلب
بحَال الديمقراطية

يشْعلوك فاللّيالي
تْخوي بيهوم والطّفا
زِيتك فْرْخَاه غالي
مْوْلّف مسكين بالحْفَى

شوف أنا كيف لْبّاس
وانت محساد بلا قياس
كتشوفني كدّير "پّام"
وكتوللي مصيبيح مظلام

***

چْلس التراكتور
مللّي شمّ البخور
عاطي من الكويرة حتى للناظور
المصباح يدور
بَانْلو كْبّور
خدّام كَيفُوسخ چَاع الحضُور

فهاد الكْفَّة داير الشْبَّة
فداك الكْفّة داير الحْرْمل
وحدَاه ورْدة لقات السْبَّة
وتحّزّماتلو وبْدات تْعرْعْر

قاتلو انت شوّاف ولاّ ميزان
كتبخّر فدار الشعب
فين حقوق الإنسان
ولاّ مافوقك من يغلب

كون تحشم على راسك
أميزان خطِيّة
وْزْنْتِيها بْنَاسي وناسك
ولاّ بالأغلبية

قالّيها يا الوردة
زيدي غُوّتي حتّى الغدّة
للي فيك مكفّيك من زمان
يا لحية الشيطان

قاتليه ميزان بَالي وغْشّاش
تعطي لأهلك القناطْر بْبْلاش
فكْفَّة كيلو وفكْفّة الفْتاتْ
بْشْحَال وزنتي قَضِيّة النّجاة

قالّيها وانتِ شْرَاوك بشحال
داروك فلِيمْنْ وما طْفّرتيه
وزنك معدوم يا شُوك الشْمال
ولونك بهات واخّا صبغتيه

وردة عْسرِيّة
مافيك مْزِيّة
زينة وزادها نور الحمّام
حاضيا القسارة
ولّفوك الضسَارة
شكون دّاها فيك أ المكْحّلة فالظلام

***

وناضت وقفات التفاحة
قالت ليهوم مامعاكوم راحة
يالاّه نخرجو يا عود الزيتون
هاد المَكان وَاقيلا مسكون

وتبعاتها اللّور الكُمِّيَّة
قالت للجمل دير النِيّة
وسلّم تسليم لأهل المكان
هادو رَاهْ ما مْعَاهُوم أمان

وناضت السّبُولة
كي مامّا غولة
وزاد الكتاب
يخبط فالباب
وكولّشي وقف
يغُوْت ويحلف
وناضت فضيحة
بالهضرة القبيحة
ألفاظ تجرح بحال السِّهَام

أواحد مْهْموم
كيشوف مصدوم
مادّ رجليه فكرسي القدّام
وخرجات بيناتهوم طُومُوبيل
باغا الدّخُل فيه من دون كلام
وَانا نغُوّت فنصَاصَت اللّيل
حتى فيّقت بْغْواتي الأنام

***

وفقت ما لقيت
لا تراكتور لاميزان
وچلست وبقيت
نشكر فالرحمان

معرفت واش حلامتي رُؤيا
ولاّ غير خيال فالمنام
والله يحفظنا من الجماد إلى حْيا
والله ينجّينا من الشر يلا دام

مايسة
mayssa.salama@yahoo.fr

http://www.elmayssa.com