الوداد طاحو فالتعادل السلبي مع صن داونز.. الفريق الجنوب إفريقي ما ساهلش والروتور فبلادو غيكون صعيب

سقط الوداد الرياضي في فخ التعادل السلبي مع ماميلودي صن داونز الجنوب اليوم السبت بملعب المركب الرياضي محمد الخامس بالدار البيضاء، برسم ذهاب ربع نهائي دوري أبطال إفريقيا، وضيع فرصة تحقيق امتياز بالرباح فالألي بالمغرب في انتظار الروتور بجنوب إفريقيا.
وسالا الماتش بين الوداد الرياضي وصن داونز الجنوب إفريقي زيرو لزيرو، وظلت النتيجة كيفما هي بيضاء رغم أن الفريق الجنوب إفريقي بقى لاعب من الدقائق الأخيرة ديال الشوط الاول بنقص عددي من بعدما تطرد له نيومايما في الدقيقة 42، مع العلم أن صن داونز كان الافضل خلال الشوط الأول قبل الطرد وماركا هدف وحيدو له "الفار"، واستحوذ على الكرة في الوقت اللي رجعوا فيه لاعبي الوداد إلى الخلف وبقاو معتامدين على "ليكنوتر اطاك"، لكن لم تكن خطيرة على مرمى الجنوب إفريقيين.
وخلال الشوط الثاني، دخل زفين فاندنبروك مدرب الواك المهاجم زهير المترجي بلاصة سيف الدين بوهرة، وخذاو الوداد المبادرة وبداو كيحاولوا يسيطروا على وسط التيران والاستحواذ على الكرة مستغلين النقص العديدي لصن داونز، ولكن الأخير ما كانش ساهل حيث وسط التيران ديالو قوي وقدر يهرس جميع الهجمات د الوداد واللي زاد من متاعب الأخير هو إصابة المهاجم ديالو جونيور صامبو اللي خرج وما قدرش يكمل الماتش ودخل بلاصتو حميد احداد، وهذا الشي إضافة إلى قلة التركيز عن لاعبيه قدام المرمى وحدا الكاري ما شكل عائق للحمرا باش توصل للشبكة ورغم الحلول اللي حاول يدير فاندنبروك وليشونجمون بإدخال كل من بنعيادة واللافي وحيمود ولكن بقات النتجية زيرو لزيرو وقبل ما يسالي الماتش جبد الحكم البطاقة الحمرا للاعب صن داونز مارسيلو برافو بعدما نبهو "الفار" حيث تدخل بخشونة في حق الودادي أمين أبو الفتح.
وتأجل بتعادل الوداد الرياضي وصن داونز الجنوب إفريقي الحسم في المتأهل بين الفريقين إلى نهائي دوري ابطال افريقيا حتى لماتش الروتور اللي غيتلعب السيمانة الجايا بجنوب إفريقيا، ومن المنتظر يكون الماتش حارق بين الفريقين حيث غادوز وحدة من الفريقين إلى النهائي، والوداد عندها امتياز اللعب خارج التيران بمعنى أن التعادل بأي نتيجة إيجابية كانت من واحد لواحد الفوق بجنوب إفريقيا غيعطي التأهل للواك.