منصب رئاسة لجنة العدل والتشريع وللا شبهة وأضحوكة مور اعتقال مبدع.. شباط دخل فالخط وحط مرشح وقيادي فالأغلبية ل"كود": واحلين بين شباط وأوزين بجوجهم كيديرو معارضة التنقاز والشعبوية

منصب رئاسة لجنة العدل والتشريع بمجلس النواب وللا شبهة تابعة لي ترشح ليه، العجيب هو إعلان ترشح جديد لبرلماني غير معروف، هادي أسبوع علن التحاقو بالمعارضة هو رؤوف عبدلاوي منعم، مرشح حزب جبهة القوى الديمقراطية، حطو حميد شباط، عفريت حزب الاستقلال، اللي جرا عليه تيار حمدي ولد الرشيد بعدما تسبب ليهم فمشاكل كبيرة وخربق حزب علال الفاسي.
العجيب فهاد الترشح لي كينافس مرشح حزب الحركة الشعبية الطبيب سعيد سرار، جا فوقت لي كيتحاكم فيه الرئيس السابق للجنة العدل والتشريع محمد مبدع. المنصب توسخ بسباب صحاب الملفات الثقيلة بجرائم الأموال، إضافة إلى أنه حتى للي دازو قبل من مبدع، واللي هوما فالحركة الشعبية طاحو بقرارات المحكمة الدستورية، حيث ساهمو فتزوير الانتخابات ودارو تخلويض باش يطلعو للبرلمان.
الحركة الشعبية عطات صورة خايبة عن المعارضة، بحيث كتعارض الحكومة بالمتابعين فملفات خانزة.
قيادي فالأغلبية أكد ل"كود" بلي هوما غادي يصوتو لصالح مرشح الحركة الشعبية احتراما للعرف وللدستور، واخا مراضينش عليه، مضيفا: "كان على المعارضة التنسيق أكثر باش تعطي مرشح يكون قادر على هاد المنصب".
وشدد القيادي فالأغلبية ل"كود": "دبا حنا واحلين بين أوزين وشباط وكلاهما كيدير نفس المعارضة ديال الغوات والتنقاز السياسي".
اليوم غاتكون جلسة التصويت على رئيس لجنة العدل والتشريع، خلفا للمعتقل محمد مبدع. سياسيا ضربة كبيرة لأوزين وصحابو، لي فشلو يحطو بروفايلات نقية قادرة على تحمل المسؤولية.