دولة قطر واميرها كيدعمو الجزائر ضد المغرب ومجلس الصحافة عندنا داير اتفاق مع قناتهم "الجزيرة". باش جزائري كيسب بلادنا كدعمو الامارة وباش مغربي كيهاجم الجزائر جزاؤو الطرد

قطر كتشجع اللي كيسب المغرب. هاد الدولة اللي ممنوع فيها تخرج تلفون وتصور عافية شاعلة فشرويطة فالشارع واللي ممنوع فيها شي حد يهز عينو فتميمهم وموزتهم٬ كتدعم اللي كيسب المغرب. كتدعم اللي كيهاجمو. الدعم بان مع الجزائري حفيظ الدراجي معلق "ييين سبورت" ديال دولة قطر.
قطر عطاتو يسب ولكن غير المغرب. هادا ماشي غير سب لبلاد. بل شكك فحدودها. طبعا هاد الشي كتساندو دولة قطر وتميمها. باش واحد خدام عندهم فبلاد ما فيها حرية تعبير او حرية الصحافة او حرية التجمهر والاحتجاج ولا قضاء نزيه٬ كيتخصص فمهاجمة المغرب بحال الدراجي٬ كنشوفو نظام قطر متواطئ معاه.
الصحافي المغربي ديال "الجزيرة" عبد الصمد ناصر باش دار تدوينة هدر فيها على "فجور اعلام نظام الجزائر الرسمي" وباللي "التلفزيون الجزائري الرسمي يهاجم المغرب بسفالة ويتهم الدولة المغربية بكل نذالة وبعرض وشرف نساء المغربيات.اي فجور غير مسبوق هذا؟ واي وضاعة هذه يا عديمي الاخلاق؟ بئس الاعلام اعلامكم الحقود وبئس ما تفعلون" ناضت دولة قطر من خلال قنواتها طلبو منو يحيد التدوينة. يسكت.
هاد الشي ما عمرهم طلبوه من الدراجي. لو ان هاداك المعلق الجزائري اللي كيدعمو قطر باش يهاجم المغرب٬ تعاقب٬ كان يبان معقول فهم طرد الصحافي المغربي.
الصحافي المغربي عبد الصمد ناصر تطرد على ديك التدوينة والدراجي اللي كتب على ما سماه "مننتخب الصحراء الغربية" وعلى تلك المنطقة ماشي كجزء من المغرب ولكن كدولة مستقلة٬ ما هدر معاه حد. امير قطر سكت. موزة سكتات. دولة قطر ضربات الطم.
قطر كتقول للي معاهم: سبو المغرب وهاجموه ولكم منا الدعم
الفضيحة ان كاع الصحافيين والصحافيات اللي من المغرب وخدامين فقطر كمواطنين من الدرجة الثانية ساكتين. ما يقدروش يحلو فمهم. كتشوفهم يكتبو فامور كتهم السياسة فالمغرب ولكن يهدرو على مهاجمة هاد الجزائري لسيادة المغرب ابدا. دعم قطر لهاد الجزائري: ابدا
دابا كيفاش شي وحدين بحالهم كيجيبهم المجلس الوطني للصحافة باسم الجزيرة باش يديرو تكوين للصحافيين لمغاربة. كيفاش كيجيبو هادوك اللي كلهم جبن وخوف ينظرو فحرية الصحافة ويتكلمو على الصحافة وعلى اخلاقيات المهنة.
اول قرار خاصو يكون ماشي بيان تضامني مع عبد الصمد ناصر كيف دارت النقابة الوطنية للصحافة المغربية٬ ولكن الاعلان على تعليق كاع الاتفاقيات بين المجلس وبين دولة تميم وموزة.
ديك الفقرة اللي قالت فيها النقابة الوطنية للصحافة "أن بعض الصحافيين العاملين في نفس القناة و في قنوات رياضية تابعة لها لم يذخروا جهدا لمرات عديدة و متكررة في اقتراف إساءات متعددة للدولة المغربية و لمؤسساتها، بما في ذلك الإساءة إلى المؤسسة الملكية في بلادنا، لكن إدارة قناة الجزيرة القطرية لم تحرك ساكنا رغم الضجة الكبيرة التي رافقت ذلك. بما يعني، وفي ضوء القرار التعسفي الذي اتخذته في حق الزميل عبدالصمد ناصر، كانت مباركة لتلك التصرفات الطائشة". هاد الفقرة كلها ما كافياش.
النقابة اللي كتسير المجلس الوطني للصحافة فشخص يونس مجاهد خاصو يوقف كاع التعامل مع قطر.
الدولة المغربية بانت حشمانة من دولة تميم. ساكتة عليه. دولة ما قدراتش حتى تدعم مغربية الصحرا واخا ملك المغرب غامر بعلاقاتو القوية جدا مع الامارات والسعودية وزارهم باش كانت هاديك الامارة الخليجية معرضة فوجودها. مشى ليها وزارها ودعمها ورسل ليها كاع مواد غذائية كنوع من خرق الحظر اللي كان مفروض عليها. هاد الشي كولو ما عطى والو. اليوم قطر كتدعم الجزائر.
قطر كتقلق ايلى صحافي مغربي سب دولة الجينرالات ونفس الدولة اي قطر كيدعم اي واحد كيهاجم المملكة المغربية. وعلاش اصلا تكون علاقة مع هاد الدولة؟